陈智燊原来系隐藏肌肉男 收埋40吋胸肌：40岁先练唔系咁容易
撰文： 冼燕珊
出版：更新：
TVB小生陈智燊（Jason），曾经系TVB嘅当家小鲜肉，虽然依家已经40岁，兼且已经封埋盘，但佢依然Keep得好fit，甚至比以前更fit，今日佢出席护肤品牌活动，虽然著咗件白色西装，但都掩盖唔到佢嘅二头肌同胸肌，Jason接受《香港01》访问，话佢依家有40吋胸肌，佢仲分享佢健身嘅秘诀，首先系饮食方面：“朝早食个奄列都有6只蛋白，加埋夜晚𠮶餐，每日都要食十几只蛋，同埋食多啲鸡胸，吸收多啲蛋白质。”
从营养学上嚟讲，蛋白质对身体组织，如肌肉的生长和复元尤其重要，而除咗饮食，当然要配合运动，Jason话以前无好认真咁去研究点样练肌肉，直到呢一年先认真咁去健身，揾咗相熟嘅健身教练朋友，同佢制定健身目标：“一个星期跑三至四日步，每次半个钟，之后就去做GYM，做吓推胸同引体上升，加埋热身拉筋前后都要个零钟头。”Jason仲有补充话如果屋企附近无GYM，游乐场都有一啲设施可以健身，前提当然系唔好同小朋友争嘢玩啦。
Jason说做运动可以令皮肤更好：“做完运动，出一身汗，当身体强壮，抵抗力好的时候，皮肤会更紧致一点，同更加有光泽。”其实Jason都讲得有道理，运动可以提高整个身体嘅血液循环，将更多的氧气和营养输送到皮肤，令全身容光焕发，除咗运动，Jason都有敷吓Masks：“其实男士都要护肤，试过拍剧拍到好Chur，落妆𠮶下好辛苦，因为皮肤太干，就拎Sarah(宋熙年)啲Mask嚟急救。”
不过Jason话只系畀自己依家嘅状态75分：“仲有好大嘅进步空间，希望可以练得更加fit，始终40岁先嚟练唔系咁容易，要再努力啲！”睇Jason依家咁fit，佢真系下好多苦功去Keep㗎，各位男士都要加油！