陆永老婆11月座驾被撞　 IG大骂肇事车主4个月未赔钱

陆永太太Reina上年11月发生交通意外，佢当时部车落地唔够一个月，被另一部车撞到，座驾被刮花，Reina事后喺IG开PO，分享反呢件事，指当时肇事车主答应赔偿，但要求Reina唔好返原厂整，Reina写道：“落地唔够一个月，停定让人泊街S位都可以俾人hi花咗，点解会咁㗎？返原厂会唔会好过份？对方肯赔不过唔赔返原厂整，等我心情平复返先再考虑。”仲话已经去警署备咗案。好多朋友留言都话肇事者整花人哋架车，唔应该仲要求唔畀人返原厂整，大家仲话Reina易话为。

以为事件已经告一段落，事隔4个月，Reina喺Instagram开Po，大动肝火大骂当日𠮶位车主仲未履行承诺赔钱，仲将同对方嘅对话Po上网，等大家评吓理，佢写道：“#人善被人欺，早知返原厂整claim保险好过！唔通我未收你钱，我同ah Sir讲你已经赔咗畀我咩？落口供就落口供啰，输咗我咪畀堂费啰⋯⋯ 我有时间，我唔怕麻烦！痴ｘ线，毛(无)啦啦受你气！#我好等2600开饭呀！”由于车主未赔钱，而该名车主又话签唔到和解纸，所以Reina要去警署落口供，迟吓仲要上庭添。

从Reina同肇事者嘅对话睇嚟，一开始Reina已经好让步，真系应对方要求无返原厂整，而该名车主就话：“希望你真系帮我报间最平。”仲话Reina系名人佢只系一般巿民，承诺会过返数畀Reina，希望大家就咁完咗件事。不过直到今日该名车主都仲未过数，期间仲诸多借口。Reina老公陆永都有留言：“我叫你揾佢，你都话等过埋初十五先追，仁至义尽喇，唔驶劳气。”睇嚟其实Reina其实已经畀晒机会对方，但对方却一直拖字诀，其实拖咗咁耐Reina先嚟爆，都真系算系“仁至义尽”。