【预算案】港姐冠亚季都未交过税　亚军何依婷：派钱帮助唔系好大

最新一份财政预算案已经出炉，将会退税上限3万元，亦会派糖人均达$7500，不过就不会全民派钱喇，咁当然有人赞好有人批评啦。其实要纳重税的人先可以退足3万，今日TVB举行新春团拜，作为无线助理总经理的杜之克对于退税就表示欢迎，话自己每逢退税都会受惠，至于他会点用退税的3万元，他说：“未谂，或者用嚟去旅行又或者捐献，帮助其他有需要嘅人，好多可能性，有得退税好吖。”

2017年港姐冠军雷庄𠒇、亚军何依婷、季军黄玮琪以及Big Big Channel最受欢迎港姐张宝欣就无得受惠于今次的退税方案喇。何依婷说：“我上年第一年做嘢唔使交税，今年开始要交，希望赚多啲交多啲，咁第时就可以享受退税，最好交到可以退足3万啦。”雷庄𠒇就话自己唔太了解香港交税机制，以往都是由父母负责处理，黄玮琪同张宝欣则仍未试过在港交税。

对于香港政府库房水浸都唔派钱给市民，只派糖，何依婷认为最紧要是帮到市民：“道理就好似系你教佢钓鱼定系畀条鱼佢，咁我觉得派钱系一次性嘅，帮助真系唔系好大，系有即时嘅帮助，但我觉得最紧要嘅系要做好点去改善民生，例如工资工时嘅问题，低收入家庭可以赚多啲钱，多啲工作机会同好啲嘅待遇，医疗同教育制度点样去改善，点去提高普通市民嘅收入水平等，做好呢啲先系最重要。”而黄玮琪就好乐天咁话：“我觉得香港政府都希望畀到最好嘅市民。”