型佬任达华Keep Fit全靠正能量同做运动：酒店房一定要有跑步机
撰文： 张嘉敏
出版：更新：
下个月就63岁生日的任达华（华哥）一直都keep得好好，就好似食咗防腐剂咁，无论个样同身形都fight低好多后生仔，man到爆，仍然可以在贺岁片《我的情敌女婿》里与卫诗雅做一对。到底华哥有甚么秘技可以留住青春，多年来都keep到个状态咁好呢？他接受《香港01》访问时表示：“最紧要保持心境开朗，同自己讲无论咩问题都可以解决嘅。”
而华哥在饮食方面都好节制，实行三戒的健康饮食习惯：“戒糖、戒盐、戒油，已经戒咗十几年，就算唔戒绝都尽量食少啲，清淡都有清淡嘅好味，我哋小朋友时食嘢都好清㗎啦，咪一样会觉得啲嘢好味，囡囡同我一样都食得咁健康。”
华哥话当然仲要配合运动，“我会游水、跑步、举重、跳绳等，无规定几耐做一次，做到就做，争取时间做。我拍戏时都会带埋条绳去跳绳。如果出trip拍戏超过3星期，我会要求间酒店房一定要有部跑步机。”