开放式厨房不利女主人？　李居明叫地产商：唔好厅加个灶就当厨房

香港人人叹上车愈来愈难，而地产商推出的细价楼又愈来愈纳米，依家大部份新楼都无特别设厨房，美其名系开放式，实则似茶水位，一向投资有道的李居明，琴晚其新戏宝《美哉秦少游》于新光上演，与主演盖鸣晖（Joyce）讲起买楼，Joyce仲话贵到连佢都唔敢买，师傅大把物业唔使惊，不过佢就话睇唔过眼依家啲纳米楼无厨房，佢话不利风水㖞。

师傅话：“我哋风水师最反对屋企无厨房位，因为无厨房就等于无女主人，亦等于无老婆，或者女人住进去，都对佢不利，所以我呼吁地产唔好唔整厨房，唔好喺个厅求其加个灶就当厨房，希望地产商以后断绝呢种风气，因为对香港嘅女人不利！”

不过依家后生一代又真系好多“无饭家庭”，TVB节目《安乐窝》主持林颖彤（Bella）接受《香港01》访问，佢都话唔钟意开放式厨房：“因为我都钟意煮嘢食，如果整开放式厨房就会成间屋都好大油烟。”不过其实Bella亦唔钟意传统嘅厨房，佢话依家同妈咪住，所以厨房系妈咪嘅主场，睇过无数楼盘嘅佢，一早已经谂好将来自己屋企嘅厨房点整：“我会用玻璃间隔划开厨房，咁样就唔会令屋企咁大油烟。”不过除咗减低油烟味之外， Bella就话唔知呢种“伪开放式”厨房于风水学上会唔会好啲。

其实于风水学角度，无厨房除咗对女主人不利，仲难以汇聚财气，古语有云：“开门见灶，钱财多耗。”炉灶代表家中的财库，开放式厨房会令炉灶于屋企中外露，就好似将钱箱长期展露人前，所以有损家宅嘅整体财运，即使本身的收入不错，聚财能力也会减弱。所以Bella就算用玻璃间划开厨房，但都会俾人见到个炉灶，于风水学上都系唔系咁好。

不过玄学始终不是精密科学，例牌都要讲句：“信则有，不信则无”，各位看官请斟酌参考，本来楼价已经令一众打工仔大叹上楼难，辛苦上到车，有个完整厨房都唔系要求好高啫！