【狗年】陆诗韵戚黛黛爱狗如命　训练方法不一致成家人磨心

狗系人类最忠心嘅朋友，来到狗年一班可爱嘅汪汪仲带挈主人们多咗唔少工作机会添﹗陆诗韵（Sharon）以及戚黛黛不约而同，带埋爱犬接受奇妙娱乐新闻主播严崇天访问。Sharon曾经透露第一只狗狗是初恋男友送，呢日带出嚟嘅贵妇狗Kina相当听话，但原来同时都系Sharon同陆妈妈成日嗌交嘅导火线之一。

作为一名狗主，陆诗韵（Sharon）自认都几严厉，佢笑言：“我恶死架，有时一大声讲野，Kina(贵妇狗)就即刻坐定定，１０分钟都唔敢郁！”爱犬Kina现年８岁，因为工作关系大部份时间Kina都由陆妈妈照顾，呢个时候Sharon忍唔住呻说：“我地两母女成日嗌交都系因为只狗！”原来陆老太对Kina过分潺爱，Sharon称：“边有人追住只狗要佢食野架？！我就唔会咁教狗，摆低野食，一段时间内唔食就拎走，唔可以又追又玩咁氹佢食野啰！”

至于戚黛黛就养咗只西施狗叫妹妹，戚家上下视如宝贝宠爱有加，同时因为过度潺爱，以致妹妹行为不失控制。黛黛苦恼地求救：“其实佢识听晒所有指令，但就系唔肯做啰，要睇心情！”见到佢咁苦恼，主持严崇天安排佢带妹妹接受狗狗行为改善课程。导师指“妹妹”平时“要乜有乜”，已习惯“不劳而获”，提议黛黛改以新奇食物重新吸引“妹妹”注意并改善其服从性。黛黛笑道：“妹妹真系老板，因为佢每日都有得拣。今日食完A餐，听日就要改食B餐，好食好住！”