【自选Playlist】5首歌应付拜年长辈问题　撑到尾《说再见了吧》

新正头大年初一，相信大家都想拜年逗多啲利是，食紧唔肥开开心心。不过，去拜年总要面长辈“严苛”嘅问题，“有冇拍拖”、“读咩大学”、“返紧咩工”、“人工几多”、“几时买楼”等等开场白年年都要“应付”。虽然你心谂“关你乜事”，但又不能宣之于口，唯有硬食。
既然要硬食，不如听住歌面对啦。戴起headphone塞住对耳，无论长辈问咩都好，笑住点头又一day。如果你面对以下情况，就试下听呢5首歌逃避一下。

1.长辈开口埋口都系“钱”

相信大家最唔钟意听到嘅，就系下下都“钱钱声”。后生仔多数都觉得，人生仲有好多事情值得关心，点解只系识得睇住个钱字呢。每次讲亲梦想，长辈就叫你“当兴趣好喇”；见到你买乐器、相机，就同你讲“储钱买砖头实际啲”。

呢个时候不妨听一听符家浚嘅《人生不是一份工》，净系歌名已经代表晒你心里千言万语。加上曲风够Chill旋律易入口，当你俾长辈问题搞到好“忟憎”，正好帮你平静一下。

2.长辈打麻雀嘈过地盘打桩

长辈们最兴讲“发番个新年财”，打麻雀、鱼虾蟹、锄大D呢啲新年赌局根本就系“指定动作”。老实讲，围埋打几圈四方城，就算打一、两蚊都开心嘅，都系志成班人笑下吹下水；不过唔系个个都钟意咁嘈呢。

呢个时候不如就听下Daft Punk嘅《Get Lucky》啦，延续一个够Chill又Up Beat嘅感觉，对住班长辈跟住拍子点头，咩都say YES就唔使烦。佢咩你听紧咩你又可以同佢讲“祝你Get Lucky羸多啲”，咁就啱晒佢哋心意啦。

3.喂，你拍拖/结婚未呀？

又嚟到一百万嘅问题：“你拍拖/结婚未呢？”

老老实实，我有冇拖拍，同几时储到钱结婚，唔会因为你问多两句就即刻变到出嚟，何必勾起我伤心事呢？长辈随口一句言者无心，但对我哋呢啲小薯嚟讲好大压力㗎。

呢个时候就最啱听野佬嘅《嫌小姐》喇！其实唔单止你听，直头可以俾埋长辈听，依家要拍拖唔系咁易㗎。唔好再讲廿年你哋点样打个电话，拖下手仔就认定对方啦。依家2018年喇，你以前用“大哥大”电话，今时今日你都用小米啦。

4.考试考成点呀？读咩大学呀？

绝对明嘅，长辈总系会讲读多啲书，做专业人士出人头地，玩音乐、影相、做手作呢啲嘢摆埋一边当兴趣好喇。长辈上晒岸当然用佢哋旧时嘅“成功法则”向你说教啦，佢哋又唔明今时今日仲有其他出路，所以先话你不务正业。其实最紧要你知自己做紧咩就得啦，呢个时候就听下RubberBand嘅《飞天》，学歌词话斋：“一跳起去找那 一片天”。

5.终于散席喇！

应付完长辈一轮嘴难题，食下嘢唔觉唔觉又到散席时刻，终于可以松一口气。真系除咗恭喜之外，都唔知应该讲乜好；心水清嘅你都知道，下年同样要面对呢时问题。点都好啦，逗完利是玩完B之后，就返屋企唔好谂咁多喇，有咩留番下年拜年讲啦。呢个时候就听Supper Moment嘅《说再见了吧》，结束“劳累”嘅一天，听日年初二仲有第二场发问大会呀哈姆太朗。