【港女讲感情】情人节系场攻防战　袁咏仪收老公粉丝送花最有Face

昨日系一年一度嘅重要节日，重要过你年三十晚食团年饭，又或者年初一要去亲戚屋企拜年，就系情人节！其实情人节性质同生日/圣诞节差唔多，都系好商业化咁食大餐同送礼物，但意义又有所不同，生日就个个都有，但个个都分布喺全年嘅唔同日子，所以就冇咁觉眼你点样过生日；而圣诞节就普天同庆，通常都会约成班朋友BBQ交换礼物，所以就算收到水杯、相架呢啲垃圾礼物，都可以影相打卡话畀大家知你有礼物收，而情人节呢就好唔同，因为一年就得呢一日，有冇花同礼物收好明显。

【港女讲感情】阿娇钟欣潼认爱赖弘国　有钱有样边使人“埋单”？

【港女讲感情】平安谷女人嫁边个冇得拣　现代就有男朋友都难结婚

所以2月14日又被命名为“情人节收花比赛”，办公室入面嘅花生友就会默默留意到底边位同事第一个收花，边个同事收最多花，又或者边个冇花收，大家嘅面子存亡关键，有人甚至会不惜买花送畀自己扮有花收。

总之呢一日就系一场攻防战，各位女士会花尽手机，除咗花好多心机用美图秀秀执靓自己之外，仲会谂好晒Facebook feed，IG Story，务求显得自己最幸福、最Sweet，分分钟个idea仲劲过Big4 广告强人。

其他参赛者：

女士们忙住喺fb放闪固然系辛苦，但背后一众男友嘅努力亦系功不可没！一年咁多节日要谂礼物已经好头痕，生日、纪念日、圣诞节、情人节，要唔重复又要有心意，难度直逼公开试考文言文。

不过，最心酸嘅都系冇拖拍嘅单身狗，有得送礼物同收礼物都仲呻辛苦？可怜嘅系有钱都冇对象去送礼物，网上面见唔少一紥紥玫瑰花同公仔被人扔喺垃圾桶。单身狗情人节冇地方去，留喺屋企打下机玩下fb/ig，WTF，碌极都系放闪相，玫瑰花系基本配备，就好似去老麦叫个餐送嘅薯条咁；iPhoneX系常餐（相信iPhoneX喺情人节系突破销量），唔想谂送咩又肯使啲钱懒人之选；而各款C字头、P字头、H字头嘅手袋银包就系诚意放血大作，相信你女友呢个月都会好温柔体贴，真系睇到都眼冤，所以成日见一班毒友喺度诅咒：“愿天下有情人都是失散多年的亲兄妹，阿门”