刘嘉玲爆初出道被郑裕玲闹过：自此我更认真工作
撰文： 冼燕珊
出版：更新：
郑裕玲（Do姐）出咗名认真，连刘嘉玲都话初出道时好惊佢，Do姐日前邀请咗嘉玲上佢嘅电台节目，佢好直接咁问嘉玲：“我有无闹过妳？”嘉玲话：“有，𠮶时真系好细个，好贪玩，啲稿又难背成日背唔熟，您又出咗名勤力认真，真系背到个剧本滚瓜烂熟，有一次我背唔熟啲对白，俾你发现咗，问我：‘你知唔知场戏讲乜？’我当时劲心虚答您：‘知知哋’。”Do姐问：“咁你有无嬲我？”嘉玲话无：“经历果次，我自此就好认真对待我嘅工作。”睇嚟Do姐嘅认真工作态度都对嘉玲有正面嘅影响，嘉玲仲大赞Do姐有几认真:“6点嘅通告，佢5点半就到，咁早到仲自己烫埋衫。”
其实Do姐同嘉玲之后就做咗朋友，间中仲会约埋食吓饭，Do姐出咗名养生，好早瞓觉休息，佢大爆嘉玲相反：“佢真系好贪玩，同佢食完饭，佢原来仲有下一场，一晚几个饭局，又钟意去蒲。”嘉玲就话：“好在我当年有去蒲，依家香港无咩好嘅蒲点，好怀念当年个个都著得好靓咁去蒲，依家无人咁做。”
+1
最后佢哋讲起虽然大家都已经揾够，但依然好热爱工作同娱乐圈，所以从来无停过落嚟，好似嘉玲咁，就依然好活跃：“我好多嘢做㗎，要拍电影、广告、真人骚、出席活动，仲有做生意添。”除咗呢啲，闲时仲有同发哥一齐行山，讲起发哥，Do姐就投诉话邀请咗发哥上佢节目做嘉宾几十次，但都约唔成，嘉玲话：“咁您揾发嫂安排好啲。”