【无间道】罗仲谦内地拍剧要吃亏：现阶段系人拣我

罗仲谦近年主力于内地拍戏，努力赚人仔，他出席剧集《无间道》宣传活动时，被问到享受在无线拍剧多些，抑或是喜欢在内地拍戏多些，他说：“老实讲，喺TVB拍戏系开心啲嘅，始终大家同声同气，成班人边玩边做好融洽。喺大陆拍戏，饮食方面仲未适应到，自己饮食比较健康，所以对呢方面要求会高啲。其实大陆对演员嘅待遇好好，衣食住行都会好照顾。”

他强调自己不会拣要在边度发展，只要有机会都会去：“现阶段嘅我机会太少，系人拣我，唔系我拣人，呢行竞争好剧烈，除咗香港、内地、台湾，仲有韩国、泰国等地嘅演员，自己要更加努力，更加吃得亏先得。（喺大陆两年揾嘅钱等如喺TVB 10年赚嘅？）传系咁传，但当然无咁夸张啦。咁喺大陆薪酬系优嘅，几多就唔讲喇。”

提到他拍电影《女儿国》时受伤兼拍到体力不支，谦谦说：“唔可以话辛苦，咩工作都辛苦，呢套戏对演员嚟讲系难度高嘅，受伤系真，不过只系皮外伤，拍戏实有嘅。演沙僧身心都好大负担，身体要负重20、30磅戏服，化咗妆又唔可以食嘢饮水同去厕所，搞到我有少少强迫症，会喺埋位之前食晒嘢去晒厕所。8-10个钟食唔到嘢好普通，我又唔好意思麻烦人帮我补妆，会死忍。如果著住戏服去厕所要个半钟，每日拍8个钟，去一去厕所就无咗个半钟，所以我唔会去。”

谦谦同郭富城一样觉得拍《西游记之孙悟空三打白骨精》以及同系列的《女儿国》是从影以来最辛苦的，拍完这两部戏之后，谦谦觉得以前所拍的古装片的辛苦都不算甚么。他说：“呢两套戏难度好高，啲人话拍古装好热，啲衫好重𠮶啲全部碎料嚟。依家会觉得拍戏等系好幸福嘅事，可以畀时间整理自己嘅心理状态，又可以同人吹下水，食下嘢。同埋会觉得演见到样嘅角色系几咁幸福嘅。”