徐天佑有老婆爱心汤水滋润　Shine未知几时拍《红VAN》续集

组合Shine两位成员徐天佑和黄又南最近积极为演唱会备战，日日减肥操肌，佢哋今日出席活动，喺露天地方吹咗成个钟西北风，唔知系咪练得太劲，身体少咗脂肪护体，两人虽然大只咗，就算今日天气回暖，都冻到腾腾颤，天佑都忍唔住话：“唔知系咪减得太劲，好似真系怕冻咗，（依家脂肪比例几多?）依家得10%，但一直都落唔到再低啲。”

天佑同又南呢排为咗演唱会进行地狱式训练，又要操肌又要排舞仲要练歌，依家流感咁劲，唔够精神真系好易病，不过天佑有爱妻汤水滋润同补身：“老婆成日都会keep住问我需要咩汤水，例如𠮶排干燥，佢就会煲啲滋润啲嘅汤水俾我。（拍拖𠮶时有无煲开?）无㗎，结咗婚之后开始成日煲，我好开心，终于等到老婆煲汤水俾我饮。”天佑讲起老婆嘅汤水，个样劲冧，系咪真系个个男人都特别憧憬老婆煲汤水俾自己饮呢？天佑因为日日都排练到好夜，练完返到屋企又即瞓，佢话老婆都忍唔住哦佢两句，不过就算点诈型都好，每晚都叫佢饮完碗汤先准瞓，劲sweet，又南都唔输蚀，有阿妈汤水饮，两个都有家人在背后support。

天佑同又南话完咗演唱会之后都要开戏，其中一部仲会一起合作，问到两人上一部合作的电影《那夜凌晨，我坐上了旺角开往大埔的红VAN》，已是4年前的事，究竟几时开拍续集，两人都话未知，但就好期待有开拍的机会。