杨洛婷两公婆互相照应　凑B唔请工人都好轻松

刚生完四个月左右的杨洛婷（Rabeea），并没有因凑女而停工，佢今日现身钟表活动，担任主持，Rabeea接受香港01访问表示，虽然佢系新手妈妈，但凑B无难度：“我哋都系自己凑，无请工人，如果我要工作，老公阿Tim就会睇住佢，如果佢返工就我自己凑，如果两个都要做嘢先交俾奶奶凑，其实依家囡囡出世4个月，都凑得好轻松。”

好多新手父母都因为照顾新生BB而焦头烂额，但Rabeea就凑得得心应手，除咗扮靓靓出席活动，佢仲可以一边凑小朋友一边抽时间做运动：“等BB瞓咗之后就会抽时间做运动，天气好嘅时候就带佢出去散吓步，所以其实凑B真系无想像中咁困身。”

Rabeea因为怀孕而重咗30-40磅，生完之后都仲有30磅，佢除咗做运动，都有其他辅助收身方法：“我有去美容院做机，1个星期3次，效果真系好好，全身瘦咗好多吋，亦减咗好多磅，另外我仲有做古法扎肚，呢个唔系只系为咗减肥，亦系有保健作用，因为生完BB之后，啲内脏移位，靠扎肚嚟令到腹直肌复元。”Rabeea所讲嘅古法扎肚，有唔少女明星生完之后都有做，包括徐子淇、张名雅、陈爽等。Rabeea强调佢唔系一个追求骨感嘅女仔，所以会选择健康嘅方式减肥。