【平安谷】沈卓盈其实识演戏 演北杏被殉葬：我自己都好享受
仲有2天就大结局的TVB剧集《平安谷之诡谷传说》，由苏玉华带头的“抗暴联盟”，除了有龚嘉欣及谭凯琪之外，其中一位饰演“北杏”人称沈大师嘅沈卓盈(Jess)。虽然剧中她的表现未算太过突出，但至少今次剧集都算令人眼前一亮，起码看得出她有用心演好这个角色。沈卓盈接受《香港01》时就话无论系被老公虐打戏还是被殉葬，“拍呢几场其实我自己都好享受，因为全程投入被人欺负同伤心，我觉得好正，搞到我自己系被虐狂咁！”
相关文章：
【平安谷】变黑兼硬食馒头 乐瞳好抑郁：我嘅人生会唔会就咁完？
Jess指现实生活中自己同北杏嘅性格，简直系两个人，“因为北杏比较细胆，怕事啲，讲嘢细细声，完全同我本身性格完全唔同，因为我系讲嘢好直同爽快嘅人。”她指每次拍摄前都时刻提醒自己，要tune返好把声。今次《平安谷之诡谷传说》成绩咁好，Jess都话好开心，“剧本真系写得好好，可以表露出当时封建社会中女人嘅无奈同认命嘅命运，所以每一part自己都好用心去演绎。”另外，Jess亦透露男友都十分识做，每晚都坐定定睇剧集，仲叫家人同身边好友捧场，“佢见到我系套戏入面俾人打都戥我可怜，所以食饭𠮶阵都叫我要食多啲。”
实不相瞒，我最记得沈卓盈嘅节目一定是2006年嘅《最紧要正字》，但其实原来Jess一开始做主持竟然系儿童节目《放学ICU》，“我初初系做儿童节目，都做咗两年，之后先跳出黎做综艺节目，再之后先系拍剧，个阵每样嘢对我都系新挑战。”现时专注拍剧嘅佢最想挑战嘅竟然就系做“傻大姐”角色，“因为都好似我性格好直，无咩所谓，嘻嘻哈哈咁，希望之后可以有机会演到呢d角色。”
其实《平安谷之诡谷传说》监制陈耀全对于沈卓盈饰演“北杏”呢𠮶角色都赞不绝口，“佢今次表现我觉得有80分，因为佢做到北杏个种悲惨，令观众都觉得佢好可怜。”揾对方参演一角嘅原因，原来系因为监制之前曾睇过Jess在《枭雄》中的演出，“当时有场喊戏，佢做到一种令人怜悯嘅感觉，所以我今次casting北杏呢个角色，我就起佢。”而Jess都十分感激监制今次俾机会佢，仲话希望之后可以再一齐合作咁话！