【港女讲感情】平安谷女人嫁边个冇得拣　现代就有男朋友都难结婚

近排大台新剧《平安谷之诡谷传说》一反常态，唔玩女人闹交争家产，或者警匪追捕讲古惑仔，今次竟然开新Chapter讲女权，故事讲喺民初一条村落，𠮶时仲系父权主义，男人可以将女人当系货物咁，系男人嘅附属品，盲婚哑嫁系基本嘢，老公死咗个老婆仲要跟埋一齐去殉葬，相信各位姊妹睇完都无名火起。

【港女讲感情】阿娇钟欣潼认爱赖弘国　有钱有样边使人“埋单”？

【港女讲感情】旅行青蛙点解咁受欢迎　青蛙唔受控制最中女人心理

套剧入面除咗陈凯琳之外，个个女人嘅老公都超大男人主义，当女人系工人或者系奴隶，煮饭凑仔劈柴担水，仲惨过返咗北韩。最SAD嘅身边嘅老公个个都系超大年纪阿叔，个个都把口又衰，当老婆系妹仔咁使，就算大住肚都要攀山涉水去担水，剧中喺《开心速递》做大小姐嘅林淑敏做立秋嫂，小产完冇人关心，仲要被老公闹抵死。剧入面大家都冇得拣自己老公，所以苏玉华错过初恋情人，下嫁最大粒嘅村长谷爷刘江，龚嘉欣本身系妹仔嚟，但都被刘江睇中做四奶，平安谷对于女人嚟讲简直系恶梦。

但今时今日就算恋爱自由，你钟意边个同边个结婚都唔系咁爽YY。而家好多人都中学甚至小学已经拍拖，女仔唔再系被迫去结婚，甚至多选择到可以收兵做娘娘。不过，喺“睇样”嘅社会里，你的样子如何，你的日子也必如何，女神真系唔系个个做到，平凡像我路过十个似我嘅大家都系正常拍吓拖咁。

但喺2018年，虽然话拍拖系可以拍拖，但话结婚就真系唔系咁容易，先唔系影结婚相摆酒过大礼要使几十万，一个家最重要有自己个窦，但今日睇新闻荃湾新楼一房单位竟然炒到要成千万都仲有人买，年轻人上楼冇望仲结咩婚。退而求其次谂租楼，市区求其租间都要万几蚊，租金够你个个月去到一转日本，想结婚生仔真系唔系咁易，冇钱冇楼，随时仲惨过盲婚哑嫁。唔系唔想结婚，系唔敢结婚，无谓害咗对方，危害下一代。