澳牛谢东闵要求合照 麦明诗受宠若惊：听日太阳应该会西边升起
撰文： 郭敏玲
出版：更新：
香港有一间茶餐厅，出名要快！食客坐低落单如果迟疑三秒，就会被伙计即场嫌弃太慢；所以要帮衬，不少人会在门口拣定食咩餐，入到去秒速嗌餐，咁就免受口舌之苦，相信大家都知道系咪餐厅，冇错就系澳牛（澳大利亚牛奶公司）喇。
不过，凡事都有例外，尤其是靓女。话说麦明诗做完嘢谂住食个下午茶，去到嘅时候，有伙计就有认得佢，仲要求自拍合照。第一次在澳牛有如此特别待遇，当然要摆上facebook打卡，麦明诗劲开心咁话：“我受宠若惊，搞到谂唔到想食炒蛋定煎蛋。听日太阳应该会西边升起。”临尾仲嚟多个#澳牛奇遇记hashtag。
+5
麦明诗事后接受《香港01》访问表示，伙记哥哥好nice：“超好服务呀真系！我未食完个通粉同蛋，佢就已经问我落埋嘢饮。你知以前嘅话，未食完就嗌嘢饮，系会畀佢哋话㗎嘛！”网民见到张相，好搞笑地封伙记哥哥为“澳牛谢东闵”，讲起澳牛虽然出名好赶，但系有啲细节都好有义气嘅：“佢哋见到大肚婆会好待遇啲，都唔系衰得晒㗎！”都有网民非常羡慕麦明诗，留言：“系见到靓女同港姐先会咁好！一般人系唔会有咁嘅待遇！”所以各位朋友，平时去澳牛食嘢，都系门口拣定算喇！