张继聪《夸世代》庆功宴现身　人间有情唔尴尬：阻唔到我地庆祝

刚过去星期日举行的台庆颁奖礼，获《最佳剧集》奖项的台庆剧《夸世代》晚上在尖沙嘴举行庆功宴，一班演员当然有出席包括陈豪、欧阳震华、麦明诗及谭凯琪等人都有出席。而所属公司同TVB打紧官司的张继聪亦有现身，他接受《香港01》访问时就话唔尴尬，“只不过系公司之间嘅问题，唔可以宣传同亮相，但都阻唔到我地庆祝㗎嘛，人间有情！”

阿聪透露自己近期都是忙于拍网剧同电影，但最开心就一定系新年有假放，“我见通告我年廿九就可以收炉，其实新年都好少开工，但我估初二应该要拍嘢，但都已经好开心。”咁情人节点庆祝呢，系咪会同“前世情人”宝贝囡一齐过？提起囡囡阿聪即刻笑到冧晒，“情人节唔咁谂啦，屋企又要照顾小朋友，都系同太太简单食餐饭，唔会出埠。”今年首次同宝贝囡过新年，阿聪同太太都有帮佢买劲多衫，提到有无再买“假发”俾囡囡，阿聪笑言买咗好多，希望囡囡无再惊戴假发。