【咁唔小心呀】古巨基自爆入错女厕：我呆了一秒才反应过来

近排古巨基动作多多，既要为宣传新歌要去唔同节目做访问，又要快闪去铜锣湾Busking，仲要帮老友周慧敏担任个唱总监，晚晚坐喺控制台指挥大局，第三场仲俾人捉上台合唱，听到都觉得佢好忙呀。一连4场终于圆满结束，基仔都可以松一口气，点知放松过头居然闹出笑话，仲俾人逼佢影低瘀事添。

连日来基仔穿梭周慧敏个唱唔同岗位，仲拍片同大家介绍红馆后台，揭开神秘面纱，就连歌手庆功宴食啲乜都可以一览无遗，基仔趁古太不在场疯狂偷食，由鸡脾到Pizza一一扫晒落肚，实行食咗先讲，估唔到庆功宴后先出事。话说基仔上载一张喺洗手间门外嘅相，唔系打卡打到去厕所，见佢头耷耷无眼睇，原来基仔居然入错厕所﹗

基仔留言话：“凌晨两点45分庆功宴尾声，人有三急去个厕所。进门后随便入了一个厕格方便，一边解决一边听到有人入来进了另一厕格。如厕后洗完手便推门离开，开门后竟看见对面厕所门出来了一名男士，我呆了一秒才反应过来，回头看到门上的人形公仔是著裙的！吖～～ 你地话到底系我太眼瞓睇错入错女厕定系佢个人形公仔条裙太窄呢？”网友疯狂俾哈哈笑emoji，仲留言问𠮶位男士到底咩反应，同埋张相到底边个揸机，基仔无奈回应叫大家唔好提：“耻笑我嘅好同事们逼我影架。”