胡定欣100枝发夹变短发　激赞御用发型师 ：佢喺我心目中系神！

胡定欣之前出战《万千星辉颁奖典礼2017》，set咗个短发造型，明明长发变短发，原来全靠佢个头内藏100枝发夹。据知帮定欣整头个发型师叫Matt Chiu，两人从2010年起已经合作咗8年，定欣多次出战各大颁奖礼嘅发型都系出自佢手，定欣直头同我地讲：“佢喺我心目中系神！”

【万千星辉】胡定欣短发收埋100枝发夹 深夜直播拆到手软

咁阿Matt又点回应定欣当佢系神嘅赞美呢？“都要另一个神先可以成就一个神嘅。”咁讲法唔好以为阿Matt份人好嚣张，其实佢同定欣只系惺惺相惜姐。阿Matt话同定欣合作咗咁多年，大家非常有默契：“好多时我send一啲发型嘅相俾佢做参考，原来佢咁啱都睇紧一样嘅嘢。”仲话因为定欣好信任佢，每次都好有信心咁交个头俾佢，令佢发挥得更加好，难怪每次定欣亮相都咁吸睛，发型师功不可没。

难得揾到阿Matt倾两句，梗系捉住佢问下当季嘅发型潮流啦，佢话依家都比较流行短发，尤其系冬天：“因为冬天啲衫比较厚同大件，配合短发会更加适合，反而长头发就显得累赘。”另外阿Matt仲提大家平时Gel头避免用太湿嘅产品，因为香港太潮湿，整完个头好易塌。

除咗定欣之外，同阿Matt合作嘅女星包括文咏珊、汤唯、周笔畅同林忆莲等，绝对系星级发型师，揾佢Set一个头系2500蚊港纸，剪发就1300蚊，星级发型师嚟讲，呢个价已经算系亲民架喇。