【降魔的】马国明等合体拍片起舞 何远东：网友集气拎奖开续集
距离今年TVB台庆颁奖礼仲有3日，所有艺人都尽最后努力拉票，希望自己嘅作品可以得到好成绩。顶头大热剧集《降魔的》今年锋芒尽露，原本只系一套实验性质嘅剧集，可以得到呢个成绩的确令台前幕后喜出望外，编审罗佩清透露续集叫《降魔的之十字路口》，一众剧中演员都出力再推，排舞拍片极速剪完放上网，何远东接受香港01访问时就话：“我地好突发去做呢件事，真系好热血，希望集气开续集﹗”
《降魔的》第二季随时开镜 编审罗佩清亲证：进一步开展灵异世界
呢条《降魔的之搅咩鬼习作》片长1分钟，用上《降魔的》主题曲《到处一游》做背景音乐，成班剧中演员包括马国明、黄智雯、胡鸿钧、黄子恒、蒋志光、谢雪心、何远东、谭嘉仪、林凯恩都有参与拍摄，除咗有舞蹈底子嘅黄智雯喺尾段热舞，其他人主要以手势为主，唔好以为佢地Hea，原来系有含意架。何远东接受香港01访问时就话：“我地无手势舞咁劲，叫做跳一只男女老幼都啱跳嘅舞，如果称得上系一只舞的话，哈哈哈﹗大家留心睇的话，d动作其实全部系喺车厢入面，揸车时会做嘅动作，好似扭軚、戴安全带、调较倒后镜位置等等。”睇真啲的确相当贴题噃。
何远东透露呢个Project真系好赶，但成班演员又可以聚埋一齐好似re Union咁真系好开心：“我地好突发去做呢件事，前晚拍片寻日剪咗成日就出啦，监制编审开咗气题，问我地可以拍啲咩片，之后用咗好短时间，好似大学生去Ocamp第二朝就要交功课，要即刻拿拿声排舞拍片，成件事真系好热血﹗其实真系好开心，大家回忆返晒嚟，心姐阿蒋都肯一齐跳一齐癫。啤啤要拍剧嚟唔到，都知会约漏人架啦，唔紧要啦，可能有续集嘅时候佢会变咗做final boss呢﹗”
之前编审罗佩清话，续集已经有晒初步构思㗎喇，就连剧名都谂好埋，叫《降魔的之十字路口》，令网友都相当期待。演员们又忽然拍呢段片，喺台庆前呢个时间点推出，何远东都坦言当然别有用意啦：“当然想叫网民集气，开到续集当然好啦﹗除咗开续集，如果嚟紧颁奖礼，我地可以拎到最佳剧集就最好啦，好靠大家嘅支持同投票先得呀﹗”