【渣马2018】蔡思贝挑战两粒钟跑完半马　女铁人再直踩台庆颁奖礼

“原来跑都可以咁好玩”呢句N年前某Online Game嘅Slogan，其实可以应用到大多数钟意跑步嘅人身上。例如蔡思贝，一个月前透露自己参加咗“渣打香港马拉松”，重拾返对跑步嘅兴趣，仲有专业嘅教练陪跑。不过咁，今年嘅渣马同TVB台庆颁奖礼咁啱都系同一日举行，真系撞到啪啪声！咁蔡思贝当日咪直踩20个钟？可以称为TVB第一女铁人

就系咁，于是问一问Sisley，点知比想像中更加chur：“朝早4、5点起身去到现场准备喇，之后跑完就去睇物理治疗，因为个腰伤都存在咗好耐，一直都忍住痛。睇完就直接返公司彩排，因为台庆有rundown，搞完就到夜晚。就算完咗，第二日都要坐早机去缅甸拍旅游节目，都好紧密下，呢几日都要执咗箧先。”晨早起床就要开turbo跑步，啲精力用晒喺渣马度，仲有成日流流长，真系要挨眼瞓…Sisley坦言都有担心过呢个问题：“跑完步会攰都好正常，希望台庆当晚气氛high啲，个人会亢奋啲顶住…不过得返呢个星期，都有慢慢去调节，呢几日都有早啲瞓觉，都好在有教练，所以应该唔太担心。”

今次蔡思贝参加渣马，绝对唔系为咗到现场影下个号码牌打个卡就走，亦唔系“忽然Sporty”。之前佢都有参加过渣马，当时挑战10k，只系用咗48分钟左右嘅时间完成。不过，Sisley练10k嘅全盛时期系可以44分钟就跑完，对于女仔嚟讲，呢个时间系好唔错㗎喇！至于今次再挑战渣马，Sisley就拣咗半马，而目标都非常清晰：“希望可以两个钟之内完成喇，得返一个星期，其实都好紧张，希望到时可以做得到喇。”对于运动型嘅Sisley嚟讲，其实唔难！加上中学时期就有玩过田径同打波，做开体能嘅佢，两个钟内搞掂绝对不是梦。