【Wanna One澳门见面会】姜丹尼尔与朴志训输游戏罚用patpat写名

Wanna One 11子姜丹尼尔、邕圣祐、朴志训、裴珍映、赖冠霖、金在奂、河成云、朴佑镇、黄旼炫、尹智圣、李大辉，寻晚（13日）喺澳门举行2018年第一场粉丝见面会《Wanna One 1st FAN MEETING IN MACAU》，除咗唱足一连串大热歌曲之外，Wanna One仲分开咗两队玩游戏畀Wannable（Wanna One粉丝名称）睇！十足十将Wanna One团体综艺《Zero Base》搬咗上舞台啊！

喺Wanna One玩游戏之前，就要先分开两队，大哥尹智圣同忙内赖冠霖各自负责带领一队，以猜包剪揼形式拣队友。虽然赖冠霖获得首胜拣走咗邕圣祐，可惜之后都输晒畀尹智圣，李大辉仲问话赖冠霖：“点解你连猜包剪揼都咁渣㗎！”最终分队名单如下，尹智圣队：姜丹尼尔、朴佑镇、金在奂、朴志训，赖冠霖队：邕圣祐、黄旼炫、李大辉、裴珍映、河成云。

Wanna One两队先后玩咗“比手画脚”同“猜猜这是甚么”游戏，喺玩“比手画脚”时，“粉红香肠团”嘅朴志训同朴佑镇扮大笨象同扮乌龟就最似、最好笑，最后仲赢埋赖冠霖队，而赖冠霖队嘅惩罚就系要以撒娇鼻音唱出《PICK ME》。

但系玩“猜猜这是甚么”时，李大辉对战尹智圣就最好笑，因为主持同其他Wanna One成员就呃佢两个，讹称箱入面嘅嘢系有生命、太大力会死㗎！搞到李大辉同尹智圣劲紧张，又唔敢掂箱入面嘅生菜，Wannable见到佢哋个惊慌样都忍唔住大笑啊！不过游戏去到最后，今次就掉返转轮到尹智圣队输咗，而佢哋嘅惩罚就系要用patpat写返自己个名！当姜丹尼尔同朴志训被罚时，Wannable仲送上震耳嘅尖叫声添！最后Wannable都知道Wanna One系限定组合，去到2018年12月31日就会结束，所以Wanna One离开舞台之前都表示好想喺2018年同Wannable留下美好嘅回忆，多多见面！

（观看更多）

  [Wanna One澳门直击]姜丹尼尔新年想见Wannable 朴佑镇保证无闷场

下载《香港01》App，更多韩星靓相、影片率先睇！

iOS：http://bit.ly/hk01app-iOS-download

Android：http://bit.ly/hk01app-Android-download

我们01韩迷的facebook专页Kpop 01已经开始喇！想知道更多韩国娱乐、饮食、玩乐、时尚资讯，快点去给like吧：https://www.facebook.com/hk01.kpop/