【开心速递】孖大小姐跳情侣手指舞　许家杰：KC Terry预咗走唔甩

历年来无线剧集制造出不少经典萤幕情侣，不过《爱·回家之开心速递》一套剧6对情侣都跑出，受到观众喜爱真系一个异数。最近佢地接力拍片，跳劲HIT嘅情侣手指舞更令网民疯传，继熊心如与池子孝（苏韵姿与阮政峰饰）、Bonnie与金城安（林凯恩与周嘉洛饰）、Mandy与博士（谢芷伦与马贯东饰）后，第四击有大小姐同送水辉（林淑敏与许家杰）﹗许家杰接受香港01访问时仲预告：“KC同Terry都预咗走唔甩架啦﹗”林淑敏仲话：“好快好快有得睇架啦﹗”

大小姐同送水辉呢一对，最近几乎每集都成为焦点，林淑敏更凭住呢个角色，被网友热捧做最佳女主角。呢日林淑敏上载短片，原来佢同许家杰终于排完舞啦，见到佢地跳得相当合拍之余，表情同身体语言仲暗藏角色性格，好似大小姐飞扑送抱，送水辉会避开兼一脸错愕，大小姐见状表现谷气。到最尾送水辉出奇不意吻向大小姐面颊，又会唔会代表剧中佢地好快开花结果呢？林淑敏留言话：“2018我希望会同送先生。。。许家杰！”最重要系Hashtag，因为佢点名话下一对到KC&Terry，呢对男男CP今次锡唔锡呢？实在令人期待﹗

相关文章

【开心速递】Mandy博士再接棒跳情侣手指舞　下一对究竟到边个？

【开心速递】林凯恩周嘉洛接棒跳爱的手势舞　又多一对情侣诞生？

【开心速递】池子孝熊心如戏假情真？　圣诞放闪跳“手指情侣舞”

林淑敏同许家杰分别接受香港01访问，Mandy就话都系速成现学现卖：“大约学跳咗半个钟左右啦。第二日都系靠食晚饭时间先得闲，同Jack夹下排舞同埋拍片大约半个钟左右。”不过原来拍呢条片用咗超强嘅期后班底架：“条片系KC揸机，Terry盈盈Jenny三个揸闪光灯，因为当时都夜啦唔够光，靠佢地手机微弱灯光先拍得到。仲有政峰家乐佢地喺喺旁边提点细节位，点样会再sweet啲，我地拍到佢地识笑先收手。虽然镜头前得我地两个，但睇到《爱回家》团队精神真系好开心。”

至于片中许家杰锡咗面珠一啖，有网友觉得好SWEET之余，都话不禁担心Mandy老公会唔会呷醋，Mandy就话：“哈哈哈，老公都有俾like同share条片，无呷醋呀仲边睇边笑。虽然戏入面话我好钟意送水辉好主动，大家系成年人无嘢啦紧系，知道做戏啫。”至于许家杰接受香港01访问时表示：“其实跳情侣手指舞系自发性嘅，一开始阮政峰苏韵姿玩先，本身无话专登要边个接棒，不过慢慢大家逐个拍，就变咗好似之前冰桶挑战咁样点名挑机，我地知道马贯东同谢芷伦tag咗我地之后咪练习啰。拍完之后我地tag下一Pair，KC同Terry都预咗走唔甩架啦﹗”