【夸世代】陈豪被车撞连蝴蝶效应都玩埋　算命佬消失似《阴阳路》

台庆剧《夸世代》仲有几日就大结局，嚟紧接住就系悬疑剧《平安谷之诡谷传说》顶上，一开始已经知《夸》系胶剧，好多老桥段都有用到嚟“致敬”。但估唔到去到尾声剧情就开始崩坏，坐的士玩时空穿越已经满足唔到大家，所以今次实行“胶事认真做”，仲加入埋穿越剧大招“蝴蝶效应”，讲Mike（陈豪饰）坐时空的士遇见自己被车撞死，编剧仲怕大家唔明呢个Term，所以陈豪仲同大家解释问时空猪：“蝴蝶效应？系咪即系细小嘅变化，就足以带动成个系统嘅运作？”

好喇，睇怕大家听完都唔太明陈豪讲紧咩，反正就系陈豪做咗啲嘢影响到佢自己被车撞死，但时空猪就好玄咁话：“命运系冇得改变嘅。”陈豪就好担心咁坐的士回到过去阻止自己被车撞呢件事，中间佢就遇到好似警讯入面先会出现嘅算命佬，算命佬批佢时日冇多，教陈豪一字记之曰就系“逃”，讲完就成个档口连埋个算命佬都消失咗，成件事好似电影《阴阳路》咁，《夸世代》临埋尾先搞咁多玄幻嘢，都唔知大结局𠮶日点收科。