【又做爸爸】高皓正宣布老婆怀第三胎：仔女叫我地生多十个

广告都有话，养大一个小朋友要400万，除咗金钱仲要无限心机，因为小朋友最需要嘅，正正就系父母亲身陪伴成长。近年转战幕后发展嘅高皓正，同医生老婆陆凯儿结婚接近8年，先后诞下一仔一女，一家四口乐也融融。虽然已经凑成一个好字，但原来佢地仲未收工，最近宣布高太已经怀孕6个月，高皓正接受香港01访问时就好开心宣布：“多谢大家祝福，系囡囡嚟架。”

2010年，高皓正与拍拖年多嘅医生女友陆凯儿结婚，二人婚后一直好恩爱，育有一子一女。女儿高纯意于2012年出生，而儿子高神悦于2013年出生。高皓正14年约满香港电视后，转战幕后工作，间中会现身ViuTv或奇妙电视节目担任嘉宾。除咗成日喺社交网分享同老婆仔女嘅生活点滴，之前仲试过带仔女拍摄ViuTv节目。早前佢太太举行新书发布会，见到佢肚大如箩先知原来又有新生命就嚟诞生啦。

即将再为人父嘅高皓正，接受香港01访问时都难掩兴奋心情：“多谢大家祝福呀，太太宜家有咗6个月，预产期系5月1号，系囡囡嚟架。小朋友知道做哥哥姐姐觉得好开心，好想即刻见到妹妹，仲话希望唔止一个叫我地生多十个，哈哈哈。”生BB唔难，要养大小朋友先有排烦，3个仔女分分钟要成1200万，高皓正都做好准备担起头家：“工作方面紧系要再努力啲揾奶粉钱啦，太太嘅诊所同埋会经营啲美容产品。演艺事业嚟紧就主要搅电影，有啲国内投资计划，希望好快成事可以公布。”