【JBJ香港粉丝见面会】高田健太自爆无朋友庆生 同粉丝过好感动
JBJ 6子卢太铉、金相均、金东汉、金龙国、权玄彬、高田健太（Kenta）首个香港粉丝见面会《JBJ 1st Fan Meeting In Hong Kong “Come True”》寻晚（6号）经已完满结束！虽然今次就无请粉丝上台一齐玩，只系得JBJ自己玩畀Joyful（JBJ粉丝名称）睇，但相信Joyful都一样受落。
摄影：黄国立
其中JBJ就要cover其他团体嘅舞曲，最低分𠮶个就要接受大惩罚，首先播出TWICE《LIKEY》时，金相均同高田健太就跳得非常落力，反而金东汉、权玄彬同金龙国就只系企喺到斋睇，仲好似大叔咁拍手掌。但一播到BTS防弹少年团嘅《Blood Sweat & Tears》时，身为忠实粉丝嘅金东汉即刻超有自信、超落力咁足本呈现，而权玄彬同金龙国就继续扮大叔拍手，当MC问到佢哋点解唔跳下，金东汉就话：“因为佢哋身价贵所以唔易郁！”而播到前辈I.O.I嘅《Pick Me》时，就更系6子全部一齐跳啦！但系负责唱歌嘅金龙国就有少少甩甩地，高田健太就因为太落力，跳到耳机都甩埋，好彩其他成员都好贴心即刻帮佢整返好。高田健太因为狂舞完出咗劲多汗，仲问Joyful系咪要除咗件恤衫添！
除咗cover dance之外，JBJ都有跳返各自喺《Produce 101》Season 2入面表演过嘅歌，好似《Open Up》、《Show Time》、《I Know You Know》同《Shape of you》等，不过就略嫌太短唔够喉，仲好似唱K畀人停唱咁添！但系喺高田健太同金龙国表演《Open Up》时就发生小插曲，两人喺表演途中卢太铉同金相均突然爆笑，之后高田健太解释：“《Open Up》编舞入面有个动作好似中枪咁要瞓落地下，因为喺中枪个下唔小心对住坐喺后面嘅卢太铉同金相均翻咗个白眼，因为得佢哋先睇到，所以佢哋就突然大笑。”
《JBJ 1st Fan Meeting In Hong Kong “Come True”》进行咗一个钟多少少MC就宣布已经接近尾声，不过香港嘅Joyful就好贴心准备咗惊喜影片送畀JBJ。首先就系同1月10日生日嘅高田健太预祝生日，睇完影片嘅高田健太仲话自己好感动，又不断发出“哇”嘅感叹，之后JBJ仲同全场Joyful唱生日歌！而好感动嘅高田健太仲话想同Joyful合照，更拎咗手机出嚟自拍，影完相之后又喺台到行嚟行去，务求同到每一个Joyful挥手打招呼以示谢意。
之后高田健太仲自爆佢喺2年前第一次去韩国𠮶时，因为无朋友所以得自己一个喺考试院食即食面过生日。今次以JBJ名义同大家一齐过真系好开心，仲话希望出年可以喺更大嘅地方，同更多人一齐庆祝！最后队长卢太铉表示：“我哋嚟紧会以新歌《True Color》comeback，希望大家多多关注。希望下次可以再嚟见香港Joyful，多谢大家，有你哋先有我哋！”提到新专辑《True Color》时，金东汉仲即刻唱咗两句，而金相均都话：“好想快啲再同大家见面啊！”
[JBJ香港粉丝见面会]全力唱《Fantasy》 高田健太、金龙国爆行踪
下载《香港01》App，更多韩星靓相、影片率先睇！
iOS：http://bit.ly/hk01app-iOS-download
Android：http://bit.ly/hk01app-Android-download
我们01韩迷的facebook专页Kpop 01已经开始喇！想知道更多韩国娱乐、饮食、玩乐、时尚资讯，快点去给like吧：https://www.facebook.com/hk01.kpop/