【20卡钻戒】Paris Hilton男友雪山求婚　早半年订千五万戒指

每个女仔都总会幻想过，被求婚嘅一刻到底系咩情景，求婚四宝“戒花纸由”（戒指、鲜花、银纸、理由）缺一不可，连本身都已经好有钱嘅美国名媛Paris Hilton都不禁话：“Diamonds Are Forever”。当然啦钻石大细可以根据自己能力去买，最紧要系心意。Paris Hilton刚上载短片及几张相，原来系男友Chris Zylka于雪山上求婚，Paris Hilton正式加入准人妻行列。不过大家好难唔俾佢只足足20卡嘅求婚钻戒所吸引，市值大约1560万港元！真系远一远都见到呀！

现年36岁嘅Paris Hilton于美国时间星期二，喺IG上载男友Chris Zylka向佢求婚嘅片段，片中见到Chris于滑雪场上单膝跪地，Paris开心答应仲揽住对方锡锡。Paris留言话：“我答应了，好开心可以跟一生中最爱、最好的朋友订婚，从未试过如此开心、安全与被爱。多谢未婚夫令我睇到童话故事真正存在。”二人8年前相识，去年2月正式公开恋情。20卡求婚钻戒相当得到Paris欢心，特别上载靓相分享，而钻戒设计师Michael Greene更爆料指Chris早于半年前揾他落单，价值足足1560万港元！