【兵仔讲兵法】剧集质素影响两性生活　陪睇《溏心3》系精神家暴

免费电视台今时今日话就话有三个台，问心讲句，最多人睇的仍是无线剧集，同时亦有不少观众边睇边闹，离不开“剧情离地”、“桥段老土”，结局千篇一律无新意之类，总结一句就系“胶到无朋友”。当然有人会话网上世界大把选择，要煲剧“中美日韩”钟意睇乜剧都得，无线胶剧关我乜事？就系呢个天真谂法，令你同另一半，包括老婆、女友、仍在追求中的女神关系改变，变好就无所谓，但系通常都系变差呢？无线胶剧的威力确是唔讲得笑。

煲剧都系谂住放工消闲娱乐，点解会影响男女感情呢？老实讲男男女女的拍拖娱乐，都系离不开行街睇戏食饭，但系行得多都会脚软啦，都要留在屋企Sweet一下，问题就出来啦，成晚流流长，总会开电视睇下，但由7点档播大陆剧，之后柴娃娃的《开心速递》，到睇少一集都唔知讲乜的《夸世代》，仲玩紧10年前争产，追唔上时代的《溏心风暴3》，叫大家仲点可以乖乖煲剧，最后结果就系一人一部iPad，女仔追韩剧，男仔打机，仲要随时戴埋耳筒，身处同一屋簷下，却变成两个世界。

还记得之前播《降魔的》，真系有不少男女一齐睇，就算出了街，或者仍在Dating阶段的男女，之后返屋企都会各自睇返MytvSuper，都叫做有共同话题，估下石敢当系咪豪仔，蒋志光一人分饰四角的搞笑，啤啤、龙猫惨死都会戥他们可怜，连马国明咁好戏都无视帝，继续做炮灰都可以讲一餐。家阵论到接住播出的《溏心3》，夏雨、司棋姐讲潮语，真系好难令人有共鸣，全剧最抢的小三角色陈敏之，也只是大洒盬花，搏得女性观众大闹特闹，但剧情其实一早估到，冇乜惊喜。最攞命是植入式广告，无啦啦会冲奶茶，夏雨闹完唐文龙又要泼奶茶，夸张得来得啖笑，最后结果又系熄电视，更加唔会同另一半讲下剧情。

退一万步讲，当大家女友或者老婆，好钟意睇《溏心风暴3》(无得解释)，作为一个男仔，如何可以说服自己去陪女友(或老婆)一齐追剧呢？就算一齐系电视机前，都只不过得个肉体，灵魂早已唔知飞到那里。甚至另一半在追剧时，你都只系会做其他事情(打机、玩电话)，一句到尾又系因为一部胶剧，令彼此貌合神离，活于各自的空间，如果女友仲唔醒目逼你睇，真系比死更难受。一出好的剧集，正是可以男女观众通杀，等于之前《不懂撒娇的女人》，女仔会赞王浩信深情，肉紧他跟唐诗咏的恋情婚事，男仔就更简单，一味睇女都已经回味无穷。

最后一样对男仔最大最直接的影响，就是拍拖的使费，一套值得大家拍住拖去睇嘅电影，200元戏票无走鸡，再加食饭饮嘢直落，随时出次街要7、8百元埋单，好唔化算。反观如果有一套让人欲罢不能，要追看的电视剧，缩骨啲讲句真系悭返唔少，但无线播紧的三线剧集，《溏心风暴3》肯定留不住观众，睇返每况愈下的收视就知，所以无线不停播出胶戏，唔系唔关大家事，更加影响到一段男女关系，如果大家有日Touch wood同另一半分手，或者追求女神失败，TVB都要负返啲责任。