【多图】蔡思贝露小蛮腰跳《到此一游》　张宝儿发住烧拍MV

凭住《降魔的》一剧而爆红的歌曲《到此一游》近期大受欢迎，真系唱到大人小朋友都识背。早前TVB更加揾嚟5个港姐小花跳住唱《到此一游》。今日佢哋为明天的表现而进行彩排，睇真啲，着住便服嘅5位小花，真系有啲似五星战队，唔知佢哋有冇兴趣成立返对组合进军乐坛呢？

MV播出之后，不少网友都认为5位的表现尚有改进空间，原来连表演者之一的张宝儿都认同。张宝儿：“其实我𠮶日系发紧烧，同埋加上我𠮶日要同条蛇合作，可以做到嘅嘢都系有限。要控制住条蛇去郁，又唔可以俾佢就咁摊喺度，又唔可以俾佢过度活跃。所以都要啲时间去捉摸，同埋拍摄时间有限。（本身惊唔惊蛇？）唔惊嘅，睇下有冇毒啦。（袁伟豪睇咗个MV未？）佢琴晚都睇咗，好彩我冇同其他男artist跳舞。不过我觉得佢都觉得OK嘅。（佢有咩评语？）唔知啊你问下佢，哈哈。”

《到此一游》MV之中，另外一个话题就是，大家都觉得蔡思贝靓咗好多。现场睇落，蔡思贝的舞步比起其他四位，又的确跳得几好，仲有条小蛮腰添。蔡思贝：“多谢大家赞赏，可能唔同嘅look俾到大家焕然一新嘅感觉，始终艺人都可以试多啲唔同嘢。例如今次主题系韩feel啲，而大家又好耐冇见过蔡思贝长头发，比较妩媚啲嘅感觉。俾大家见到我另外一面，而又buy我嘅，我都好开心。”

据知这次MV的制作费到七位数字。而几位小花为了这个MV更在工作之外抽时间到排舞室练习，每晚由凌晨12点开始排舞，3，4小时的排舞结束后才回家，然后第二日又开始工作。今次实在系TVB制作的“另一巨著”。