【筋肉人夫】杜汶泽爆肌举160KG铁饼 田蕊妮：系咪要参加奥运？
撰文： 洪晓璇
出版：更新：
讲到中年男士特征，通常会即时谂起秃头同大肚腩，甩唔甩头发好多时睇先天遗传，至于会唔会中年发福，就要睇你放唔放弃自己啦。日日有住家饭食，食完就坐坐完就瞓，想唔中央肥胖都几难，虽然新陈代谢的确比年轻人慢，但有心唔怕迟，好似幸福人夫杜汶泽，自己识煮咁多好嘢食一样keep住fit爆身形，呢日上载短片，成功举起160KG铁饼，足足352磅！
圣诞长假期，去完一个又一个派对，大堆脂肪食落肚，杜汶泽都keep住去做运动，27号中午又去咗健身室，留言话：“挑战三饼半（160kg），成功！”160Kg有成352磅㖞，分分钟有3个田蕊妮咁重，睇返段片一开始阿泽埋位行到仪器前，喺教练辅助下，举起三饼半足足160kg。一举起阿泽已经标晒汗，状甚痛苦但继续顶硬上，深蹲再举起两下，当放低铁饼一刻佢即时跪低不停深呼吸，真系睇到都觉得辛苦。连老婆田蕊妮都不禁转载短片兼留言问：“系咪要参加奥运？”
其实勤于锻炼嘅又点止阿泽一个，张继聪呢个圣诞节带住老婆谢安琪以及两个小朋友周围去，都有偷时间去健身，仲一边举哑呤一边大show结实手臂，佢臂上个纹身简直好似想爆出嚟一样。如果阿泽举得起3个田蕊妮，唔知阿聪可以举起几多个谢安琪呢？