【25周年】林志颖历年专辑沦为囝囝层层叠　宣布出新碟开世界巡唱

提起林志颖大家会谂到啲乜？Kimi爸爸？iPhone VIP？职业赛车手？后生一辈可能只记得佢拍《爸爸去哪儿》，但其实17岁出道嘅林志颖系歌手出身，以小旋风之名横扫亚洲，出道1年即踏上红馆举行个人演唱会，创下最年轻红馆开个唱男歌手嘅纪录，至今都仲未有人打破。原来眨下眼佢已经入行25周年啦！呢日宣布相隔11年后将会推出新碟，仲会开世界巡回演唱会添！

被封为人生胜利组代表嘅林志颖，一出道已经爆红，但佢喺96年事业高峰时选择入伍当兵，退伍后出过几只碟成绩都未如理想，毅然到内地拍剧，凭住段誉、小鱼儿等角色再度爆红。之后遇上爸爸离世再到大仔Kimi出生，林志颖发觉家庭先系最重要，推咗大部分演艺工作陪囝囝成长。早几日佢整理25年来出过嘅录音带及CD时，被囝囝拎嚟当玩具层层叠高，令林志颖笑言：“是不是该多发点专辑，让他们可以叠得更高！”估唔到事隔几日佢就宣布将会出新碟嘅消息啦， 绝对系歌迷们最好嘅圣诞大礼。