【又到圣诞】环保换物皆大欢喜？　卫诗雅陈家乐抽到废物笑唔出

平安夜除咗街里爱人一对对，唔少人会选择同朋友开派对倒数迎圣诞。抽奖都要讲运气，为免有人空手而回，好多时都会玩交换礼物，近年更兴起玩“环保换物”，将屋企一啲自己无用，食之无味弃之可惜嘅嘢拎出嚟交换。日前卫诗雅、陈家乐、许靖韵连同一班公司同事开Party，开宗明义玩交换废物，仲上载咗片段到Facebook，唔少人睇完都觉得好有共鸣，到底边份礼物最废，收到最想反台呢？仲未准备礼物嘅朋友不妨参详一下。

过期六合彩10张

香港人唔少都钟意测试一下自己嘅运气，小小地买六合彩买个发达梦都唔错，十张六合彩票最平都真系要$100，符合交换礼物条件。不过十张过期彩票，除咗警醒大家要靠自己唔好谂横财，其实可以拎去回收。

折台一张

折凳贵为七大武器之首，奥妙之处可以藏于民居之中，随手可得仲可以坐著佢来隐藏杀机，就算被警察捉到都告你唔入！呢次仲要拎张折台出嚟交换，实用性本身好强，不过要喺公司擡番屋企，可能要CALL车先得啦。

过期月饼

每逢节日总有唔同应节食品，端午食粽冬至食汤圆新年食瓜子，要数最容易食剩嘅应该系月饼，比较滞每次食得唔多，留番圣诞节用嚟交换，呢个提议的确唔错，不过记得睇下过咗有效期未呀，食到肚痛就唔好啦。

已开封护肤品

护肤品其实系几实用，买保湿系列无论男女都适合，不过拎番上年抽番嚟，开封试用过嘅𠮶一罂出嚟，都真系几唔卫生，搽上面敏感点算好呀﹗宁愿抽到一疉试用装好过啦。

有渍有味小背心

每个女仔屋企都总有十件八件背心，打底防走光保暖衬衫都得，非常百搭。由许靖韵提供的粉红色背心仔，只色虽然抢眼啲都总叫用得著，但原来开Show用过上面仲要有渍，呢个系咩玩法呀……

I Phone5电话壳

手提电话每个香港人都有，可能唔止一部添，送电话壳本身系几实用嘅一件事，不过拎嚟交换，又点知抽到𠮶位用紧咩型号电话呢。呢位同事仲要送出I Phone5电话壳，I Phone X都出咗成个月啦，真系拎番屋企装瓜子壳咩……

车头相架

虽然样样都废，但数到压轴最废一定系陈家乐收到的相架。由细到大交换礼物，得到唔少杯呀、摆设呀、相架之类看似实用嘅礼物，废又唔废得晒但自己唔会用啰。陈家乐抽到呢份A4 Size相架要买都好几十蚊架，不过摆张黑白相喺度，话晒过节真系大吉利是咩。