【早霸王】酒吧失身3日闪电示爱　结局连森美小仪都绝对估唔到！

每逢一到星期五这个日子，就知道是《早霸王》表白环节《你知道唔知道有人挂住你》的时候，今朝早有男听众子浩打电话上嚟揾森美小仪帮手示爱，佢就话：“早两日喺酒吧度同班朋友饮嘢，咁就识咗个新朋友，大家饮醉咗，果晚同咗佢过夜。”森美听完之后打个突，搞笑咁话：“边间酒吧？有冇搞错！封查咗佢！”但等阵先，先两日咋㖞，爱情会唔会嚟得太快啊？子浩说：“圣诞啊嘛，𠮶日起身大家当冇事，喺佢屋企走，佢系自己住嘅。”

子浩表示之后都有同佢Keep住Send讯息，好似普通闲偈咁倾，冇特登倾返𠮶晚嘅事，森美就追问究竟佢哋两个倾啲咩：“你走嘅时候有冇问今晚得唔得闲，又或者晏昼Send讯息话挂住佢，问佢今晚原来得闲食唔食餐饭，咁做先知你对我有意思，要有呢个行动，如果你冇做就摆到明完咗当唔识！”但小仪都忍唔住问今日先系第3日，你今朝早就约佢，会唔会太快啊！森美都加把口讲：“你咁快打电话畀佢同佢示爱啊？你中间咩都冇经历过㖞大佬，真系多鬼余！唉，你真系，你哋第一晚咩都发生过你地都咩啦，可能系我个人真系Old-fashioned啲。”

但子浩并冇被森美小仪动摇到，佢坚持自己嘅想法：“我想同佢一齐啰，想同佢过圣诞，想今晚约佢食饭。”原来今次系子浩咁大个第一次一夜情（One Night Stand），森美随口问一句：“第一次One Night Stand就钟意人，你属咩㗎？桃花咁旺嘅！”点知竟然引到子浩爆料话自己原来冇拍过拖，森美同小仪两个人都吓到不停哗哗声，森美话：“未拍过拖咁大胆嘅，你嘅One Night Stand咪你嘅第一次，你真系好刺激㖞！会唔会太快啊！我建议你真系唔好打畀佢，你咁快打畀佢好大件事㖞。”

子浩就好希望今年有人陪佢过圣诞，仲话唔成功的话，就想森美顶上同佢今晚食饭，森美见佢咁主动积极，就即刻帮佢打畀女神表白啦，电话接通，系把男声嚟嘅，小仪愕然再问一次：“喂，你好，我想揾阿真，系，我想揾阿真。”原来阿真系个男仔，“阿希事件”再次出现，森美小仪笑到出唔到声，后尾小仪平伏返情绪就话：“圣诞快乐！呢度系电台打畀你，我系阮小仪。”而森美都系改唔到佢嘅刻薄口吻：“你去开边间酒吧，我少啲去，我意思系我唔去酒吧，饮酒冇益。”最后子浩直接就问阿真可唔可以同佢一齐，而阿真亦好顺摊应承咗，事后森美回忆道：“唔怪得之佢想同我食饭啦，你哋改名可唔可以唔好咁中间得唔得啊？叫阿真都有！大家最紧要唔好饮醉酒，平安夜要睇住自己嘅身体，唔系个个好似佢地咁！”