【万千星辉】杨明第5次提名飞跃 台上自嘲：我系old seafood
撰文： 林迅景
出版：更新：
《万千星辉颁奖典礼2017》1月份就会举行，各项提名亦都在今天（12月21日）全数公布。每年到这个时候，全港电视观众都会好似买赛马咁，“贴”自己嘅心水目标，演员又会顺便拉下票。
TVB每年都系同样地宣传，同样地举办，奖项名单亦都相差无几。站在观众立场，虽然TVB搞足咁多年颁奖典礼，好多事都已经公式化，而大部分人扭开个电视机亦只系纯粹睇下星咁解。不过，如果大家站在演员的身份角度谂下，呢一个每年一度嘅颁奖典礼就显得好重要。
就以今年“飞跃进步男艺员”为例，有《踩过界》张振朗、《亲亲我好妈》何广沛、《降魔的》黄子恒、甚至乎有“飞跃男艺员提名王”之称的杨明以及以节目主持入围的陆浩明。
陆浩明：“完全估都估唔到我可以入围，所以第一个边个通知我呢，就系麦美恩WhatsApp通知我。所以我今次都好惊喜，可以话系圣诞之前收到嘅一份好大嘅礼物。尤其是我细细个就已经有睇阳明嘅作品，好难得今次有份可以同前辈一齐角逐‘飞跃男艺员’，所以我今次呢票反而会投俾杨明。”
睇返以往记录，杨明由1999年加入TVB 18年的历史至今。杨明已经先后被提名4次，2017年这次的提名已经是第5次。就连颁奖典礼公布提名名单的活动上，杨明都自嘲自己为“old seafood”：“咁多年都系飞跃男艺员，我都一把年纪啦。不过我都好开心，证明咗我仲好后生，同埋我仲有进步空间。”