【乐视清盘】曾赞助李克勤每月睇英超 以后睇曼联唔通又要翻墙？
撰文： 李妍桦
出版：更新：
“乐视香港”日前入禀法庭申请清盘，大家最留意肯定是乐视嘅体育Channel，唔知“乐视体育”会唔会受影响，究竟买咗超长命50年会籍嘅会员点算？当年乐视以“天价”31亿元购入3季英超播放权，仲连NBA都有睇得，所以近几年乐视入屋率相当高，唔少人都因为月费平而转会睇乐视。而香港讲睇波，不得不提“真魔粉”李克勤，基本上系人都知佢系曼联死忠，当年曼联嚟香港佢仲亲手整礼物去送畀人，礼物就畀人放咗喺更衣室，而“送礼勤”呢个名就被大家讲到依家。
+3
李克勤时不时都喺Facebook Share自己睇波心得，赞下自己爱队曼联有几威水，但有一次唔小心打卡Cap自己睇波，畀网友发现李克勤睇嘅竟然系翻版嘅直播Link（Broadcast），明明足总杯系乐视独家播放，克勤被大家闹爆佢揾咁多钱都唔舍得畀4旧水港纸睇波，仲笑佢可能因为系TVBuddy先唔买乐视。
事后克勤就解释因为佢当时唔系香港，先至唔可以用乐视睇波，仲话其实因为做完歌唱比赛节目《我是歌手4》之后，乐视一直都赞助佢每个月嘅睇波月费，仲送埋部电视机畀佢添！但而家乐视香港话要清盘，咁克勤点算好？今年曼联个势咁劲，迪基亚fit到爆炸，单场扑救14次，紧随曼城排第2名，极有机会争夺英超冠军，唔通克勤又要上网揾鬼Link睇波？