杜汶泽世纪难题考起fb友　香港仔隧道行边条线好：虚心求教

杜汶泽出名敢言敢行，平时见佢好钟意喺Facebook分享生活照，平时有感而发评论社会时事，深受网民喜爱，可以话系个好出色嘅KOL。上个月佢喺Facebook驾驶Group求助网民，杜汶泽上载咗几张停车场嘅相，原来系隔壁架七人车泊得太出，阻住咗佢出车，佢仲嬲嬲猪咁话：“或者我泊车技术差啦，硬系觉得呢个位有少少难泊！唔知佢车头预咁多位呢种手法其实系想表达啲咩呢？”事后网民话佢哗众取宠、小事化大，仲引用政府嘅准则话四个辘入晒就无问题。

事隔一个月，杜汶泽今日又去驾驶Group请教网民，经过上次之后，今次佢就学乖虚心问大家意见。原来佢搬咗办公室入黄竹坑，但喺收工时候揸车行香港仔隧道出铜锣湾时，就成日塞车，杜汶泽就想问究竟系行左线定右线先唔塞？哗，呢个真系世纪难题嚟，唔少网民都搞笑用《头文字Ｄ》Cap图留言，亦有人突破盲肠问杜汶泽张隧道相系点影？事后杜汶泽就开估，佢话原来有警察系铜锣桥面控制左右分流，所以行左行右都会塞啊。但提提大家，入咗隧道千祈唔好因为塞车而乱Cut线，唔止系好危险，仲有可能会被隧道方面罚钱。