【任噏乱评】Google揭露最赤裸真相　闹完咪又系睇返TVB！

而家呢个世代，好多网民似乎会不屑收睇TVB剧集。讲起大台，主要都会讲几句对白：“我唔睇胶剧㗎㖞！”、“睇韩剧好过喇！”，再唔系每一套剧都会揾错处，睇下当中有啲咩位系低成本Hea作。再唔系就好似最近《溏心3》咁，见到张海报就话弃剧：“套路照旧，罢睇！”不过，有一种证据叫数字，而数字从来都唔会讲大话。最近Google就公布“2017年热爆关键字搜寻排行榜”嘅结果，第一位系呢排人人吹奏嘅《降魔的》，咁都未算！十大排行榜入面，有4套都系TVB剧。内地剧《射雕英雄传2017》仲因为TVB播，多咗人搜寻，呢个现象证明咗啲咩？证明咗TVB基本上已经占据住你嘅生活！系霸权嚟㗎！

讲到呢度，可能有读者即刻反驳：“我从来都唔睇TVB㗎㖞！”呢样都明嘅…其实好多人都会有“口里说不，身体很诚实”，就算你唔睇，你见到有网民讲套剧有啲咩胶位，今集又死几多人，就会开始手痕上Google揾。再唔系见到有啲唔起眼嘅演员，喺TVB挨咗几多年先有返少少成绩，你又会走去Search，因为钟意睇人有几惨…要揾嘅理由何其多，亦都知道大家系唔会讲出口。

而且TVB愈多人口讲嫌弃，证明愈占据喺大家心中。就好似过去三年嘅十大热搜字排行榜，TVB最尽都系占一两套，就好似2016年就有《城寨英雄》、2015年有《张保仔》，仲有2014年《使徒行者》，但2017年就嚟个大跃进，一炮过有4套，有《降魔的》、《不懂撒娇的女人》、《使徒行者2》同埋《超时空男臣》。唔钟意嘅理由可以得一个，钟意嘅理由就好多，Cult、够小品、够抵死派胶等等，总之系令到你走去Search啰。再者，身处咩都闹咗先嘅年代，其实TVB喺大家心目中好重要，而且几乎站稳住脚啰。

再睇返香港附近，台湾嘅十大热搜排行榜。当地第一位系第二十九届夏季世界大学运动会，咁自己嘢支持都好应该吖！虽然台湾𠮶边，娱乐类别占最多，但唔计韩剧嘅话，台湾咁多电视台，都唔愁冇剧睇，但都都系两套上榜。相反香港呢？上年多咗个ViuTV，今年多埋奇妙电视，但点解连影都唔见？唔系好期待《诡探》咩？又话Eason套《短暂的婚姻》值得一睇嘅？最后都不敌霸权，选择投向TVB𠮶边…再一次证明，大台喺大家心目中好重要。

嚟到最后，见到香港台湾嘅十大热搜榜，了解到呢一带嘅人都系钟意消遣娱乐…但台湾都起码有单当地年度盛事吖…但香港除咗睇剧，Apple出咩机，都应该有其他更本地嘅嘢值得我哋关心㗎嘛。再睇下美国嘅Google十大，最软性只系手指陀螺同体育赛事，其他都系时事要闻，见唔到iPhone 8、iPhone X…好多人话《权力游戏》、《怪奇物语》好睇？Marvel电影又有新Trailer？DC电影有几不济？Google都见唔到佢哋…𠮶榜只见到佢哋眼中真正嘅大事。而香港最重要就系TVB…喺呢个榜学到啲乜嘢？就系唔好逃避真相，事实大家都钟意睇TVB。