【壹号皇庭】监制邓特希筹备律政新剧　亲自游说原班人马上阵

无线经典剧集《壹号皇庭》系列深受观众喜爱，就算重播又重播，都keep住有捧场客，第五辑的重播版就快播完，不断咁翻炒重播，到底会否有机会开拍第六辑呢？香港01记者就访问了该系列的监制邓特希，早已离开了TVB成立自家工作室的他说：“目前确系构思紧拍关于律政题材嘅剧，其实一直都有咁嘅计划，都希望用返《壹号皇庭》呢个班底。我都有同自己好熟𠮶啲朋友，好似吴启华、陶大宇同骆应钧提及过，佢哋都有兴趣，不过都要睇返个档期，佢哋个个都好忙。”

虽然大家都好期待有第六辑的出现，但要拍出好似以前咁高质的《壹号皇庭》都有难度，绝非照办煮碗观众就会钟意，甚至会有反效果，邓特希说：“再搞就要有全新嘅面貌，唔可以用返以前𠮶套，因为时代唔同咗，观众都进步咗。今时今日TVB嘅剧系要同全世界竞争，唔系净系得亚视，亚视都无咗啦。我要揾到一个有信心嘅方向先可以拍得好。”

至于演员阵容方面，想原班人马上阵，他当然会亲自去游说：“次次我都亲自同啲演员去倾，都唔单止系亲自咁简单，亦唔止系用诚意去打动，呢行好现实，必须要有合理嘅条件畀到人，要好多嘢配合，所以都要花好长时间，现阶段已经筹备紧。”《壹号皇庭》当年的反应咁好，为什么又不食住个势接连拍埋第六辑呢？监制解释说：“呢个题材喺90年代已经拍晒，当时我揾唔到新方向再可以点拍，再拍都无新意，咁不如唔好拍，转用其他题材，所以就出现咗《妙手仁心》。”