【P牌网购团．多图】网购不停中伏　货不对办棉花糖机玩到著火？

今时今日购物已经进化到唔止足不出户，只要拎住手机，真系去紧洗手间都可以俾钱买嘢。格价容易咗感觉上买到平嘢，但质素又系咪成正比呢？平时都睇过唔少买家中伏案例，平嘢系咪一定无好嘢？由罗敏庄主持嘅ViuTV新节目《P牌网购团》，每集用唔同主题喺预算价钱内网购一堆产品，第一集就以“小朋友生日会”为主题，用$1000为6个小朋友庆祝生日，有得玩有得食，仲玩到著火添，真系睇到都牙烟呀﹗

$1000可以做到啲乜？喺香港买个蛋糕都要二三百，不过呢集节目以$1000预算，成功购得蛋糕、餐具、食品制作用具、特别造型服饰、玩具、布置装饰以及表演用具，仲有$200净﹗咁平，质素有无问题呢？首先有个大水池连钓鱼竿及玩具，SIZE极大足够俾多位小朋友一齐玩，可以做水池又可以放沙入去，$126系超值嘅；另一样令妈妈大赞嘅就系金属汽球布置，香港买一只英文字都十几二十蚊，呢次佢地买齐“HAPPY BIRTHDAY”连埋坐地汽球柱都系$124，两位妈妈罗敏庄同DADA都惊呼：“好抵呀﹗”

不过世事边有咁完美呀，好似$57买番嚟嘅彩虹千层蛋糕，送到时系得几包粉、几枝食用色素，要自己花时间亲手整﹗两盒CREAM虽然有冰袋雪住，不过又要等包装送货集运，嚟到主持人手上乜都融晒啦，奶类制品无雪实在太危险，最终佢地只能整一个“千层无CREAM班戥”……另一个自制汽水喷嘴，使用前罗敏庄都话想买个返屋企玩，点知用咗一次之后就疯狂漏汽水，未饮唔见一半，仲搅到大家忙住清洁添。

全集最伏嘅就绝对系棉花糖机，一开始开机倒糖都真系有制作出少量棉花糖，点知开心完无两分钟，棉花糖机居然著火﹗好在当时一班主持人正在试用，小朋友仲未到咋，佢地都话“棉花糖机真系MUST NOT嚟架﹗”。当然啦，网购其中一个大风险就系无得睇实物，又无售货员现场教授点用，学罗敏庄话斋：“唔会放落口嘅嘢好似生日帽同汽球，网购真系好选择。”不过食物同电器啦㖞，都系揾啲有信誉嘅舖头先好买，安全至上呀。