余文乐结婚正式封盘　小仪：都估到你地会揾我问回应啦！

“男神结婚了，新娘不是我”，余文乐喺12月5号下昼正式封盘，上载婚纱照正式迎娶拍拖一年嘅台湾女友王棠云，喺办公室简直听到一地心碎声。黑白行礼照片中，余生余太笑容一致，喺身后一众亲友嘅掌声，以及漫天花瓣下，携手迈向人生新阶段。见到呢张相除咗戥佢地感到高兴之外，唔少人即时谂起嘅，其实系小仪。小仪得知乐仔婚讯后接受《香港01》访问时话：“都估到传媒会问我回应架啦，你地系第一间﹗”

2016年8月，网上曾经疯传一篇“报导”，以“传余文乐、小仪公开恋情、承认相恋”为题，话乐仔同小仪出席活动时承认恋情，虽然系误传得啖笑，不过乐仔曾经于社交网站留言承诺：“小仪，如果我过几年都找不到对象的话，我们就真的在一起吧！！！”有好多网友都等紧呢一日出现，估唔到无几耐就传出乐仔同王棠云拍拖，依家仲要结埋婚正式落闸添，咁小仪点算好呀﹗

同网友们一样，我地第一时间都谂起小仪，希望关心下佢依家嘅心情。小仪得知乐仔婚讯后接受《香港01》访问：“哈哈哈﹗唔好话你即时谂起我，我都即时谂起你地(传媒)，究竟边间最快问我回应，你地系最快嘅﹗当然开心啦，单系睇张相都感受到佢地好幸福，啲幸福咇晒出嚟呀，当然要恭喜佢地啦﹗(事前知唔知佢结婚？)我点会知呀，我谂住香港得极少数佢地最CLOSE嘅人会知，我点会知呢﹗恭喜佢地啦，祝佢地幸福美满，不过我知佢地一定会幸福架啦，睇张相已经FEEL到。”

不过乐仔承诺过会娶你架噃，依家余太不是你，小仪又会唔会失落﹗“所谓嘅承诺系话如果我无人要就佢要呀吗，边个话我无人要啫﹗都未去到生命最后一日，系咪？做人唔可以咁悲观嘅﹗”小仪讲得好呀﹗希望在明天呀吗，入得厨房出得厅堂，娶到你一定好幸福﹗