【暗】暗黑版《Stranger Things》又系唔见仔　加埋时光机玩穿越

套路说穿了其实世界大同，尤其电视剧，无线剧套套寻亲，大陆剧就独爱穿越，但只要玩得好，旧酒新瓶一样好睇，好像Netflix新剧《暗》，点读？暗同音，这套德国剧集，将寻亲、穿越玩到出神入化，睇第一集已feel到阵神剧味。

 

《暗》绝对可以称得上系暗黑版《Stranger Things》（怪奇物语），又系主角唔见咗个仔，不过《暗》再夸啲，连主角老豆后生𠮶阵，亲生细佬亦失踪，一个家庭两代都唔见咗个仔，已经曲折离奇，仲未够，一开场另一主角老豆吊颈自杀，留下一封遗书，写明几时几日几分前唔好拆开，哗！呢啲opening，点顶得住唔追呀？虽然剧透咗咁多，但放心唔会影响追看性，因为你根本唔知剧情点发展。
 

因为套剧牵涉４个家庭故事，各有悬案，亦同《Stranger Things》 一样，有个幕后组织操控，当然又系研究一啲超自然科学，最后出事𠮶啲套路啦，虽然真系同《Stranger Things》好似，但《暗》绝对唔系copy cat，细位做得更仔细，剧情非常复杂，所以睇《暗》真系要打醒十二分精神，因剧组唔会当观众白痴，情节去得几快，亦唔会有少少轻松位，全程都好崩紧。

 

虽然真系有好多位可以同《Stranger Things》比较，但放心，你唔会睇到柴台，原来同一样的材料，失踪小孩、神秘组织、穿越时空，有啲情节其实无线剧都有用过，例如失踪少年回到过去重遇父母，但对方唔知，系咪劲似《爸不得爸爸》呢？不过《暗》dark好多，所以只要肯花心思，同一条桥一样可以变神剧。其实电影、电视发明超过了100年，有咩桥段未见过？唯有在情节及组合上花心思，而《暗》就系最佳示范。