【黑人问号】转载剧集片段　吴尊灌篮神技吓窒Nick Young

圈中有唔少艺人热爱打篮球，香港代表有“Fishman Lok”余文乐同周柏豪，台湾有周杰伦、萧敬腾等，佢地在公在私都同某啲NBA球星交过手，打下友谊赛或拍广告通常只系点到即止。美国NBA Golden State Warriors球员Nick Young，亦即系大家好熟悉嘅黑人问号主角，转载咗一段吴尊灌篮动态图，对佢嘅高超篮球技术只留下三个字：“Oh my god”原来吴尊先系隐世高手﹗

其实Nick转载嘅灌篮片段，系2008年台湾偶像剧《篮球火》当中嘅片段，呢套戏除咗吴尊仲有言承旭以及罗志祥，就好似《少林足球》以及《功夫灌篮》一样，呢套剧集以武功结合篮球，几位主角都有自己嘅绝招。呢次令NBA球星都睇到呆咗嘅，就系“亢龙无悔灌篮”。吴尊饰演嘅无极尊，接到波后于中场起跳，胯下换手运球，再施展疑似轻功水上飘，喺空中横跨三大步后灌篮成功。点止戏中主持要大嗌“Oh my God”，就连Nick事隔九年见到呢个片段都吓到呆咗，并附带一个惊吓Emoji。

最好笑嘅系，吴尊转载咗Nick嘅留言并话：“Hey, That’s me... OMG! Yes, that’s a comic-style basketball film Hahaa. By the way, I got a 4 yr old son... Let’s do a ‘Father & Son’ 2 on 2 game someday.”除咗同Nick讲条片中灌篮嘅正正系自己，吴尊仲介绍自己有个4岁囝囝Max，邀请Nick揾日来一场父子对决，仲附上一张图片，下半部系吴尊同Max著住球衣企喺场边嘅背影，而上半部就系吴尊同高比拜仁比赛嘅相片。Nick咁热爱中国文化，又开微博又不时到中国、香港玩，相信佢都会想认识吴尊呢位新朋友嘅﹗