【夸世代】处女作即拍台庆剧演江美仪囝囝　余德丞：我有尽力做

《夸世代》入面尚家有除了有几位好“索”嘅千金谭凯琪、龚嘉欣及江嘉敏之外，其中日前登场，饰演二小姐江美仪嘅仔仔余德丞（Dickson），年仅28岁嘅佢都受到不少女观众关注。首次拍剧就做台庆剧，仲要身边全部都系TVB当红小生花旦， Dickson接受《香港01》访问时都话当初监制揾自己时受宠若惊，“因为之前有客串过Joe（监制陈维冠）嘅剧集，今次拍外厂同外景都系第一次，仲要同咁多前辈合作，紧张就一定有。”

Dickson未加入娱乐圈之前曾是香港游泳代表队成员，2014年加入TVB后就担任体育台的外景主持，其后仲踏足儿童节目，一做就2年，“都有不少小朋友同家族粉丝，虽然而家儿童节目就无做，出街都有啲家长认得我嘅，但体育节目仍会keep住做。”为了学做戏，之前他仲参加埋黄秋生的演艺班，问到今次俾自己几多分时，Dickson笑言，“又唔可以由自己俾分嘅，但我有尽力做。”提到今次剧中做饰演尚浩洋，第一次拍剧就已经可以同麦明诗及陈嘉宝有感情线，真系艳福无边，咁今次有无同佢地有kiss戏呢？Dickson就笑住话：“去到最后会有嘅，但都唔算太激，只系蜻蜓点水式咁kiss。记得当时好紧张，始终咁多人望住，呢啲嘢平时唔会公开做架嘛，所以都NG左几次。”

其实有不少女观众关注到余德丞都唔系无原因嘅，之前曾是港队游泳代表，又有40吋胸肌，外形又咁靓仔，到底感情生活系点呢？Dickson笑言，“呢啲嘢无理喇，呢𠮶年纪工作行先喇！”系啰，如果唔系应该有好多女粉丝心碎！