【出猫特攻队】Nonkul同家燕姐跳十字舞揾银　明年去美国升学

泰国电影《出猫特攻队》今年8月上映时掀起一阵热潮，票房成绩咁好当然带挈一班演员，戏中饰演“宾爷”的小鲜肉Nonkul昨晚就特意到香港，与薛家燕出席荷里活广场举行的“贱萌熊舞动爆笑圣诞”启动礼圣诞宣传活动。虽然电影在暑假上映，但Nonkul的人气仍然keep得住，著住红色西装嘅佢都好识做一出场就用半咸淡广东话，“圣诞快乐！我系nonkul”之后仲同家燕姐battle十字舞！

原来今日Nonkul身体都有点不适，但他表示见到粉丝们即刻好返晒，今次Nonkul只逗留24小时就离港，问到几时会再嚟香港见下粉丝时，他透露，“其实我姨妈住系香港，所以周不时都会去香港玩同shopping。我最钟意香港嘅小食同甜品，一阵都会买返去俾屋企人食下。”至于今年圣诞节他就选择留在家中与家人渡过，“圣诞节都周围好多人，我同家人都唔钟意去人太多嘅地方，所以节日都会留系屋企过。”

至于之后嘅动向，今年读大学Year 4嘅Nonkul透露，“听日就要去返学，希望可以尽快完成学业，如果有工作都会一路接，但学业为先。”但以下嘅消息应该令不少粉丝心碎，因为Nonkul指希望大学毕业后可以到美国留学，咁一班fans点算好？Nonkul笑言，“如果真系留学嘅话，都可以搞下fans meeting，都会继续见面。”