【兵仔讲兵法】睇《猎场》学追女攻略　办公室恋情明知错都要去马

胡歌主演的电视剧《猎场》，近日引起了不少话题，比起尔虞我诈的商业战争，他的感情世界相信更多人关心，而男神亦终于有着落，跟公司的女同事拍拖，心水清的剧迷不难发现，他的恋爱对象不是合作伙伴，就是公司同事，根据“喺度食唔好喺度屙”的潜规则，商业奇才胡歌似乎不大理智，现实是讲就容易，兵仔在办公室有否遇过女神，令你返工都变得特别有意义，究竟打工仔在公司追女仔是否死罪呢？

反对在办公室拍拖的大有人在，理由其实好现实，就系拍影响饭碗，老细一句爆你：“公司请你返嚟系做嘢，唔系沟女呀！”观感就梗系即时跌到落谷底，断估无几多个老细系鼓励下属积极在公司揾对象啩？在老细立场，打工仔的返工时间已卖了给公司，做私人嘢梗系死罪，咁拍拖算不算私人嘢，不用多说啦。当然你可以企硬话拍拖不会影响工作效率，事实系同事若然升级成男女朋友，只要一方受到责难，另一个就一定不好受，问心自己是否真的做到毫无私心，老细对女友开火，自己只能做“忍者小灵精”，男性尊严扫地，如果一时冲动反爆老细，就随时饭碗不保，的确是人生交叉点。

情侣在蜜月期当然想见足365日，但世界上不止有“日久生情”，在公司日对夜对，又会否欠缺私人空间而“日久生厌”，甚至当情侣嗌交时，仍然局住要返公司，彼此欠缺一点降温时间，分分钟在公司炒大镬，结局又是指向影响饭碗。如果出现最严重的分手情况，仲要日日见住面，开声做衰人那位会内疚，被飞者更加会伤心难过，咁又有乜谓呢？若然分手时超级不愉快，到达“再见不再是朋友”级数，有你无我𠮶只，其中一位辞职已经是意料中事，能够继续冷静理智地做同事，相信彼此感情在分手前早已进入冰河期。

讲咗咁耐，办公室恋情似乎是一种打工仔魔咒，但系咪因为咁就要铁定心，只要是同事就要成为情人blacklist，钟意咗都不敢去爱去追求呢？如果钟意一个人，要左计右计，又要睇老细面色，又怕同事闲话，咁仲系咪真爱呢？真心爱一个人，你不会去介意是否会打烂饭碗，爱情从来都不是理智的产物，遇上啱嘅人点解不敢去马？就是那个同事身份，讲真大部分人打份工都是几年货仔（除了公务员），但一个啱嘅人就随时陪你一世，何况转工唔难，但要遇上真心摰爱就好讲缘份。兵仔如果每日好想返工，好想见到女神，不要再等啦，快快向女神表白，记住女神身边不止你一个兵仔，仲有好多敌军，一不留神女神俾人追咗，日日俾“闪光弹”袭击就真系呕血啦。