【淘宝骗案】明星同款有保证？　范冰冰Baby惨被PS“乱换衫”

早前双11淘宝单日销售额高达$1682亿人民币，大家唔知贡献咗几多呢？艺人著过用过嘅衫裤鞋袜，好似特别有保证，网购嘅方便，令大家更容易买到心头好，用明星图一search就可以揾到大堆“明星同款”商品，虽然明知系仿制，不过好多人著款唔著牌子，同偶像著一样嘅衫自我感觉特别良好。不过，如果个星根本无著过，咁又点计好？

上到淘宝网，可以揾到数以万计“范冰冰同款”商品，都唔好计较正牌定冒牌住啦，外形相似都大受欢迎。不过原来好多都唔关范冰冰事，而系PS大神嘅功劳，事关有冰冰粉丝发现，好多声称系“范冰冰同款”商品，佢根本无著过无用过，而系卖家key图！

冰冰嘅粉丝将淘宝照片上传微博留言话：“我…觉得…有点…怪怪的？！”睇番啲相，好几张范冰冰嘅表情都一模一样，有啲就系个人同背景光线明显有出入，成个好似飘浮一样，好3D㖞﹗范冰冰本人都有转载呢篇微博隔空向淘宝卖家话：“呃…那个⋯能不能别给我乱（PS）穿衣服，说真的，我也是要面子的。好吗？”今次真系唔知好嬲定好笑啦。

受害嘅又点止范冰冰一个，随便一search就可以见到杨幂、Angelababy都有“被著衫”，好多呢类假图，都会将艺人key上红地毡，后面有大堆面目模糊嘅记者疯狂拍照，令大家感觉上件衫可以出大场面，价钱都可以标得高啲。以前就话有图有真相，自从PS大神出现之后，呢个世界变晒啦，就算买家秀都可以造假，唯有自求多福啦。