【3日2夜．多图】陈庭欣游斐济继续三点式　禁色令后仲有无得睇？

TVB忽然推出禁色令，讲明公司不鼓励拍剧或综艺节目时，有太过夸张女性身材或者卖弄性感的镜头，有传禁令正正针对近期捧出多位女神嘅旅游节目《3日2夜》。“工作指引”推出后，18号晚播出陈庭欣（Toby）斐济之旅第二集，系就系仲有三点式，不过仲有一幕系Toby喺泳衣外套上潜水衣，唔少网友慨叹，以后睇女星游水都可能会著鲨鱼装……

禁色令写明，日后女艺员如果需着上三点式泳衣拍摄，例如进行水上运动、浸温泉等镜头，会在适当时候安排穿上T-shirt。推出工作指引时间咁啱喺《3日2夜》播出陈庭欣到斐济两集之间，大家都好奇节目会唔会受影响。拍就一早拍完啦，相信TVB唔会KEY件T-shirt咁突兀，不过会唔会重新剪接就真系要等播出先知。最终新一集陈庭欣继续有著泳衣，仲有三套咁多！

节目中Toby著上黑白连身deep V泳衣玩海上划艇，有阳光有靓女赏心悦目，见佢只艇离水上屋有一段距离，都应该拍咗起码大半个钟，最终出街，就只有6秒钟。另一套泳衣黄绿色比坚尼就用嚟拍mood shot，即系行行企企摆pose配旁白𠮶种，配埋斐济嘅日落，系靓嘅。

不过大家最深感受应该系第三件泳衣，一直影住toby半身，佢望住镜头介绍斐济玩意，然后，著上一件潜水衣，唔止封胸，封到连锁骨都见唔到，网友话拍摄时就好似神预言一样，预知有禁色令推出，睇怕以后女艺人都要买定鲨鱼泳衣出埠啦。斐济之行播完之后，到底仲有无《3日2夜》？查看官网暂时见11月25号晚继续会播放，据知会系朱智贤游首尔，到时播出仲有无浸温泉同落水环节呢？真系要留待下回分解啦。