黄真真与男友Gus相识15年：3星期前决定开订婚派对

双春兼润月特别多人办喜事，今年娱乐圈亦有唔少人选择拉埋天窗。11月16号除咗有Anjaylia陈嘉宝公开婚纱照，仲有导演黄真真。佢喺Facebook上载3张同另一半嘅合照，不过佢唔只系有婚纱相，仲有一张订婚派对邀请函，原来佢喺15号已经静静鸡举行订婚派对。黄真真接受香港01访问时话：“成件事好急，3星期前先决定开订婚派对。”

黄真真嘅订婚派对邀请函非常特别，就好似电影海报一样，黄真真同男友Gus分别拎住枪，chok晒样指向镜头，相片以黑白粗微粒制作，有点似西部牛仔片通缉相一样，感觉就似“凶”紧宾客“唔系唔嚟呀嘛。”黄真真接受香港01访问时话：“无求婚呢Part架，识咗Gus即系我男友已经 15年，拍咗拖5年，本身谂住开party庆祝认识15周年，点知讲讲吓就谂不如订婚啦，其实都系3星期前先决定呢件事，即刻揾人帮手准备裙同埋book场地、Live Band。”导演都特别多谢好友帮忙，先可以临急临忙成事。

订婚派对大约邀请咗100人左右，全部都系黄真真认识10年或以上嘅亲友：“黄百鸣、郑丹瑞、阿Fi薛凯琪都有嚟，大家一齐饮嘢随意上台同Live Band玩，好开心。（有无感动落泪呀？）无呀，我地都无喊，想enjoy party，专登无讲啲感动嘢。”

订完婚下一步一定追问嘅，当然系几时结婚啦，导演就俾咗个好好嘅答案：“问得好呀，我OK架结婚其实，不过我觉得自己唔会，因为好懒，平时拍戏已经要筹备好多嘢，到自己就会唔想烦。（可以净系签名注册架）咁又想同朋友见吓面分享一吓，其实结婚呢啲就好似俾个机会，同一大班朋友亲戚见面，寻晚订婚已经好好玩好满足，我谂应该就唔会搞结婚啦。”