【功守道】马云电影一日点击破亿　打低李连杰甄子丹变宇宙最好抽

到底有咩剧本可以打动李连杰、洪金宝、甄子丹、吴京等华人最著名嘅顶级动作巨星，参演同一套戏仲要齐齐坐歪做配角？电影《功守道》就做得到，因为老板兼主角，叫做马云(你懂的)。之前喺精华片段中已经见到佢大战各大武打巨星游刃有余，近23分钟嘅正片11月12号晚凌晨网上有得睇，至今短短1日半点击率已经突破1.1亿，睇嚟大家真系好有兴趣，马云嘅商业头脑劲定武功造诣醒。吴京接受访问时仲爆料，话李连杰讲明“只许他(马云)打你，不许你打他”。

短短23分钟嘅《功守道》双11于内地6个城市嘅影院上映，12号凌晨网上免费有得睇。之前预告片中见到马云轻松打低各路英雄，完整版中睇得更仔细，马云飞身踩墙捉住吊灯，飞踢相扑选手，一气呵成非常流利，而且仲会大晒金句：“武功再高，也怕菜刀。”不过讲完就唔系拎菜刀，而系拎起脚边木棒同吴京对打，除咗押韵，其实唔知讲嚟为咗乜，高人做事确系高深。中间加插一堆美女，见到马云大叫“好帅呀”“男神呀”，唔通马云大师系想话俾大家知，“你的样子如何，你的日子未必如何？”

吴京明明喺《战狼2》可以遇神杀神，点知对住马云就分半钟已经被KO，英雄形象荡然无存。吴京接受访问时爆料话，拍摄《战狼2》时收到李连杰电话，为咗维护世界和平，呀唔系，系推广中华武术，吴京将原订嘅手术推迟。平时拍戏对打要收力：“但马师傅他不收劲，我说你真不留手呀，那我也不留手。”点知喺旁边嘅李连杰就开声：“不行！只许他（马云）打你，不许你打他，他待会儿要见总统，你把他打晕了谁去见呀。”就算马云唔使见总统，如果你系吴京，又敢唔敢真系打低马云呀……