【降魔的‧专访】马国明唔觉视帝返大陆易揾钱：上到去甚么都不是

《降魔的》不经不觉今日已经来到第十集，被多套大制作台庆剧夹在中间，一直都不被看好，但出来的口碑和收视都尚算不错，不少人力赞剧本有创意，演员演绎十分到位。讲起演员，剧中的主角马国明一向拥有观众缘，在此剧以贴地的形象出现更获得大赞，有观众扬言马明靠今套剧可以在年尾赢视帝！

观众们当然想马明拎视帝，因为他入行十七年，做过那么多深入民心的角色，但一次真正的视帝也未曾拿过，不过原来他并不是这样想，在接受《香港01》访问的时候，马明说：“我不嬲拍嘢都唔系点谂奖，我成日都会谂返自己当初入TVB嘅初衷，到而家我都系钟意做戏，做戏又唔系为咗攞奖。我每日开工我都好开心，可以做到唔同嘅角色，喺自己钟意嘅范畴做嘢，又可以揾到钱，呢样系最开心嘅嘢。奖我不嬲就唔系好谂，但可能好多网民成日话我灰足几多年，呢啲系网民角度睇呢件事，咁我又唔介意嘅，我不嬲都唔钟意澄清一啲嘢。举个例子讲返，几年前AV𠮶单嘢，佢问我有无睇过，我话无就呃你喇，三十几岁点会无睇过，仲扮纯情咩。但我亦都唔会去澄清，始终娱乐新闻嘛，大家开开心心咪得，又唔系犯法嘢。奖有系开心，但无嘅话唔会失望，始终奖项系要有啲缘份，同埋某啲因素，有无奖就随遇而安喇。好似你喺马来西亚或者新加坡攞奖，返到香港又未必有，因为个个market都唔同，正如吴京套电影喺大陆好劲，喺香港就普普通通。”还记得，在2012年凭《On Call 36小时》张一健（一件头）一角爆红，不过却失落视帝，但宣布黎耀祥当选时，更露出呆样，可能因为这样，网民觉得TVB欠他一个视帝。

虽然自己不渴望奖项，不过今年颁奖礼他却有一个心愿，“今年我希望我演嘅剧集可以拎最佳剧集，无论《心理追凶 Mind Hunter》定《降魔的》，个剧本都系我自己好钟意，我哋呢行成日讲，一个演艺生涯遇到嘅好剧本唔会好多。亦都好坦白讲，我做咗17年，我钟意嘅剧本可能真系得四、五个，一只手数得晒，难得今年有两个我都系好钟意，我好希望可以攞到最佳剧集。尤其是我成日觉得TVB无一个奖系俾监制同编剧，变咗唯一俾到佢哋嘅肯定就系最佳剧集，虽然咁多年有人上台攞奖都会同佢哋讲多谢，但真系得句多谢啰，唯一一样嘢可以放喺监制房就系最佳剧集，所以希望拎到喇。不过呢个希望都好难喇，今年太多大制作，我自己心知喇，呢两套都唔系咩大制作，唯一可以做嘅嘢就系做多啲宣传喇。（仲有咩系你钟意嘅剧本？）《On Call 36小时》一定有份喇，不过唔讲喇，唔好搞到其他剧唔系好剧咁，事实唔系咁，只系我个人喜欢啫。”其实马明真的很替人设想，所以无论圈中或观众对他的评价都好高。

讲起人缘，马明都谈及其实公司的艺人未必都像外界所想一样勾心斗角，即使当年陈展鹏拎视帝，个个起身唯独他坐底，并不代表他们不和，其实私底下关系都不错，他说：“啲人成日讲到我哋一班艺人要斗咁，好似钟意王浩信就唔可以钟意我咁，其实唔系，我哋其实大家都想大家好，有钱齐齐揾。好似之前展鹏买咗楼俾屋企人，我都有讯息俾佢恭喜佢，大家做呢行咁辛苦，一开剧又无得瞓，想点啫？其实都系想揾多啲钱，第时有个屋企舒舒服服，我又好，展鹏又好，未结婚架嘛，将来要娶老婆，现实啲都系要钱架嘛。其实大家都系想大家揾到钱，我而家喺大陆拍紧嘢，大陆一个横店系有4、50组剧开紧，𠮶啲街外钱嚟架嘛，大家去揾啰，唔通一个人拍得晒咩。良性竞争系会有，但唔会系恶性，大家揾到钱咪几开心啰，有朝一日揾到钱，我同展鹏、浩信、萧公子揸架靓车去下午茶，吹吓水，几咁开心。”

钱对马明是一样现实的东西，如果拿到视帝，随时可以北上揾大钱，究竟要视帝定要钱呢？马明立即真性情，他说：“真系钱重要啲，我好坦白咁讲，钱系重要啲。不过奖唔系唔好，奖对新人系好好，对佢哋真系有一个鼓励，但对我哋呢啲做咗十几年嘅人，尤其是我，好坦白咁讲，我真系想要奖金多啲，因为始终将来要结婚生仔，有阿爸阿妈，系咪奖金实际啲呢，问我就系嘅。（视帝北上揾钱易啲㖞？）我又好坦白咁讲，其实就唔关事嘅。我终于明白点解祥仔（黎耀祥）佢早两三年讲过嘅一番说话，佢系视帝喇，佢话只系香港系视帝啰，返到内地就甚么都不是，佢好坦白咁讲。唔理你乜嘢视帝都好，你返到内地就要重新适应过一个新嘅market，你要知道个玩法，我而家都系开始接触。”

下期专访：会有马国明讲大陆拍剧的演员黑幕，还有他跟黄心颖的事，密切留意！