【再亲我好妈】江美仪拍《亲亲我好妈》续集　泄幕后编导大换血

TVB近年惯例，收视理想嘅剧集就会乘胜追击开拍续集，《使徒行者》、《溏心风暴》、《宫心计》拍完一辑又一辑。不过呢D大制作云集一线小生花旦，唔系争产就系勾心斗角，一系就不停爆破同揾卧底，睇得多真系有D攰，有时小品温情戏反而更得观众欢心。年初嘅《亲亲我好妈》由不被看好绝地反弹，唔少网民大赞该剧内容够贴地，道尽一众港妈心声，而呢套剧亦准备开拍续集啦。

2017年已经接近尾声，翻查资料今年TVB黄金时段播放咗大约30套新剧，当中《亲亲我好妈》可谓成功刀仔锯大树，由江美仪、吕慧仪及陈敏之担正，播出前不被看好被视为炮灰，播出后来个大逆转受观众追捧，获得网民赞赏内容够贴地，讲中唔少家长心声，即使自己未做爸爸妈妈，怪兽家长都总有一个喺左近。

江美仪喺网上留言话：“《再亲我好妈》！？《亲亲我好妈》！？严太回来了！？你们期待吗？”Hashtag写上亲亲我好妈同严查向善，正式宣布《亲亲我好妈》开拍续集啦，其实何广沛都有分享剧本封面照，从中得知暂定剧名为《再亲我好妈》，有心水清嘅网民就发觉，佢地不约而同喺剧名前加图案或抹走一d字，怀疑续集系咪有机会变成网剧，甚至放到BigBigChannel播放。

开拍续集观众就当然期望原班人马上阵啦，何广沛同江嘉敏呢日喺IG上载咗一段STORY，见到片段中有影到严家全家幅，相信剧集已经拍摄当中，演员似乎都继续参演，但幕后就似乎大换血啦。《亲亲我好妈》由关永忠监制，卢美云编审，不过睇番江美仪上载嘅剧本封面，监制变成李志伦而编审娱成郑月明。翻查资料李志伦Jacky综艺节目出身，系圈中著名MV导演，执导超过1500个MV，年初由余咏珊力邀回巢TVB，不过就无执导连续剧经验，较为熟悉嘅只有《爱情来的时候》其中一个单元。新戏仲可唔可以延续贴地温情格局呢？睇嚟要等下年播出先知啦。